Ռուսաստան մեկնել ցանկացող հազարավոր հայաստանցիներ հետ են ուղարկվում սահմանից

«Ժամանակ» թերթը գրում է. «Ռուսաստանի Դաշնության կողմից միգրացիոն օրենսդրության փոփոխությունները բավական անհարմար վիճակում են դրել այս ամիսներին Ռուսաստան մեկնող հայազգի քաղաքացիներին: Թեև փոփոխություններից հետո Ռուսաստանի դեսպանատունը և տարբեր գերատեսչություններ հայտարարեցին, թե Ռուսաստան մեկնել ցանկացող ՀՀ քաղաքացիները Դաշնային միգրացիոն ծառայության կայքում նախապես պետք է ստուգեն եւ պարզեն, թե իրենց անձի հետ կապված երկիր մուտքի արգելքի հիմքեր կա՞ն, թե՞ ոչ, սակայն նույնիսկ այդ պարագայում բազմաթիվ քաղաքացիների սահմանից հետ են ուղարկում: Այսինքն՝ նշված կայքում ստուգում են, պարզվում է՝ որեւէ խոչընդոտ չկա իրենց հետ կապված, սակայն սահմանը հատելուց իրենց տեղեկացնում են, որ ինչ-որ խախտման պատճառով չեն կարող մուտք գործել ՌԴ տարածք:

Ոչ պաշտոնական տվյալներով՝ միայն այս տարվա 4 ամիսներին մոտ 30 հազար ՀՀ քաղաքացի է մերժվել:

20 օր առաջ ավտոբուսով Ռուսաստան մեկնել ցանկացող Վահան Զոհրաբյանը «Ժամանակին»տեղեկացրեց, որ ինքը նախապես կայքում ստուգել էր, պարզել, որ ամեն ինչ «մաքուր» է, և տոմս էր գնել, սակայն Լարսի անցակետում իրեն տեղեկացրել էին, որ ինքը անցած տարի խախտել է Ռուսաստանում գտնվելու ժամկետը:

«Ինձ հետ ուղարկեցին ու ասացին, որ ես նախորդ անգամ 4 օր ավելի եմ մնացել, այսինքն՝ խախտել եմ ժամկետը, բայց գնալուց առաջ ես ստուգել էի, ու ամեն ինչ մաքուր էր ցույց տալիս»,- ասաց Վահանը:

Վերջինիս խոսքով՝ այդ օրը միայն ինքը հետ չի ուղարկվել: Ավտոբուսում եղած 24 հոգուց միայն 2-ն են հատել սահմանը, իսկ մնացած 22-ը մերժվել են:

«Ահավոր վիճակ էր, բացի մեր ավտոբուսից՝ էլի ավտոբուսներ կային, երթուղայիններ, ու բոլորին էլ հետ էին ուղարկում, շատ քիչ մարդու էին թողնում: Բայց հետաքրքիրն էն ա, որ բոլորն էլ ասում էին, թե նայել են կայքում, և ամեն ինչ մաքուր է եղել»,- հավելեց մեր զրուցակիցը»:

Առավել մանրամասն' «Ժամանակ» թերթի այսօրվա համարում