«Օրենքով գող» Արտյոմ Սարատովսկի հարցաքննությունը (տեսանյութ)

Ինչպես հայտնի է դարձել «Прайм Крайм»-ին, ՌԴ ՆԳՆ աշխատակիցները շարունակում են սարսափի մեջ պահել գողական հանրությանը։ 4 ամիսների ընթացքում նրանք 3 «գողական հավաք» են կանխել, ձերբակալել են ավելի քան 20 «օրենքով գողի»։ Նրանցից 8-ը քրեական պատասխանատվության է ենթարկվել: Վերջին ձերբակալվածը 36-ամյա հայ «օրենքով գող» Արտյոմ Սարգսյանն է (Արտյոմ Սարատովսկի)։ Նրան ձերբակալել են Զատկի նախօրեին՝ Դոմոդեդովոյի շրջանում` հերոյինի ազդեցության տակ: 

Արտյոմ Սարգսյանը «թագադրվել» է Թուրքիայում անցյալ տարվա հունիսին՝ Դաթո Ջանգիձեի, Բոնդո Ստուրուայի և այլոց հետ։ Գաղտնիք չէ, որ «նոր արյունն» անհրաժեշտ է հակամարտող գողական կլաններին` պատերազմը շարունակելու համար։ Արտյոմի «մարտական մկրտությունը» իրեն երկար սպասել չի տվել։ Անցյալ տարվա հոկտեմբերին Դաթոյի և Զլակոյի հետ նրանք Արմավիրում հաշվեհարդար են տեսել տեղացի «օրենքով գող» Արա Մուրադյանի հետ, ով Դեդ Հասանի «թագադրած» վերջին «օրենքով գողն» էր։ Այդ ժամանակ սպանվել էր Արայի մերձավորներից մեկը։ Ասում են, որ Արտյոմը զարմացել էր դեպքերի նման զարգացումից և ընկերներին մեղադրել իրեն սպանության մեջ ներքաշելու համար, չնայած հավաքվել էին պարզապես խոսելու։

Գուցե  Արտյոմին տանջել է այն հանգամանքը, որ ինքն, ի տարբերություն Դաթոյի և Զլակայի, հայ է: Հավանաբար, հենց այդ պատճառով էլ նրա բողոքներն ըմբռնումով չեն ընդունվել նրա օտարազգի մեղսակիցների կողմից։ Շուտով կոնֆլիկտը տարածվում է նաև Հայաստանում և հարուցում նոր դեպք` կապված հենց Արտյոմի հետ:  Լենինականցի «օրենքով գող» Զապին է դիմել մի տղամարդ, ում խոսքով՝ Արտյոմը, մինչ «օրենքով գող» դառնալը, իրեն չի վճարել նարդիով պարտված պարտքը, և այդ հանգամանքը թաքցրել է իրեն թագադրողներից։

Հայ «օրենքով գողերը» նրան հայրենիք են կանչել՝ իրավիճակը պարզելու, սակայն այդ այցը տարբեր պատճառներով հետաձգվում է։ Եթե այդ անձը չի ստել, ապա Արտյոմն ընդմիշտ կզրկվի անունից, քանի որ խաղային պարտքը պատվի հարց է, և այդ մարդը չի կարող «գող» համարվել՝ անկախ կլանային պատկանելությունից: