Մրցում են պատանի փրկարարները (լուսանկարներ)
Այսօր «Հայաստան» մարզական հասարակական կազմակերպության տարածքում մեկնարկեց ՀՀ ԱԻՆ պատանի հրշեջ-փրկարարների հանրապետական առաջին մրցաշարը:
Մրցաշարի նպատակն է նպաստել պատանիների ֆիզիկական և հոգեբանական դաստիարակությանը, հաղորդել արտակարգ իրավիճակներում կողմնորոշվելու հմտություններ և գործնական գիտելիքներ, ձևավորել պատասխանատվություն և գիտակից վերաբերմունք հասարակական և անձնական անվտանգության հարցերի նկատմամբ, ինչպես նաև հետագայում իրականացնել փորձի փոխանակում այլ երկրների պատանի հրշեջների և փրկարարների միջև:
Առաջնությանը մասնակցում են ՀՀ ԱԻՆ ՃԿՊԱ քոլեջի, Երևանի թիվ 190 ավագ դպրոցի, «Մխիթար Սեբաստացի» կրթահամալիրի, թիավարության մարզադպրոցների, Լոռու, Տավուշի, Շիրակի, Արագածոտնի, Արարատի և Արմավիրի մարզերի, ԼՂՀ, Սևանի ջրային մարզաձևերի դպրոցների հավաքական թիմերը, որոնք բաղկացած են 13-17 տարեկան պատանիներից ու աղջիկներից:
Պատանի փրկարարներին ՀՀ ԱԻ նախարարի պաշտոնակատար Ա. Երիցյանի ուղերձը փոխանցեց ՓԾ տնօրենի տեղակալ, գեներալ-մայոր Ն. Գրիգորյանը' շեշտելով արտակարգ իրավիճակներին պատրաստ և իրազեկ լինելու կարևորությունը, և բոլորին մաղթելով հաղթանակ:
Մրցումներն անցկացվելու են հետևյալ մրցաձևերից' ձգում կախ դրությունից (տղաներ), հրում հատակից (աղջիկներ), վազք' 100 մ և 1000 մ (տղաներ), վազք' 60 մ և 500 մ (աղջիկներ), փոխանցումավազք' 4x100 մ, հրշեջի մարտական հագուստի կրում:
Քանի որ ՀՀ ԱԻՆ պատանի փրկարարների հավաքական թիմը մասնակցելու է միջազգային հավաքների, մասնակիցները պիտի հանդես գան նաև երկիրն ու ԱԻ նախարարությունը ներկայացնող գեղարվեստական բեմադրությամբ և տիրապետեն օտար լեզուների:
Լրագրողների հետ զրույցում ՓԾ տնօրենի տեղակալ, գեներալ-մայոր Ն. Գրիգորյանը նշեց, որ սա սկիզբ է շատ ավելի մեծ գործի' երկրում հրշեջ-փրկարարների կամավորական շարժման ծավալում, ինչպես նաև երիտասարդ սերնդի արտակարգ իրավիճակներին պատրաստվածության, ֆիզիկական ու հոգեբանական զարգացում:
Առաջնության մասնակիցներից մի քանիսն անցած տարի արդեն ընդգրկվել են նման մրցույթներում, շատերը զբաղվում են տարբեր մարզաձևերով (լող, թիավարություն, ֆուտբոլ, բոքս, կարատե, ձյուդո և այլն): Ու թեև նրանք մինչ այժմ շատ քիչ առնչություն են ունեցել փրկարարական գործին, վստահ էին, որ քրտնաջան աշխատանքի ու պարապմունքների շնորհիվ կարող են հաջողության հասնել ու մրցանակային տեղ զբաղեցնել: Առաջին անգամ պատանի փրկարարների մրցումներում ներկայացված էր նաև ԼՂՀ հավաքական թիմը, որի անդամները հիմնականում Ստեփանակերտի ավագ դպրոցների սաներ էին:
Նույն օրը ՀՀ ԱԻՆ մշակույթի կենտրոնում անցկացված գեղարվեստական մրցույթին առաջնության մասնակիցները ցուցադրեցին իրենց ստեղծագործական ունակությունները, որի ընթացքում գեղեցիկ ելույթով աչքի ընկան շիրակցիները:
Ամփոփելով արդյունքները' հանրապետական առաջնության մրցանակային 3-րդ տեղը նվաճեց Արարատի մարզի հավաքական թիմը, 2-րդ պատվավոր հորիզոնականը զբաղեցրեց Շիրակի մարզի հավաքականը և հաղթող ճանաչվեց Երևանի թիվ 190 ավագ դպրոցի թիմը:
Մրցանակային տեղեր գրաված թիմերը պարգևատրվեցին ՀՀ ԱԻՆ դիպլոմներով, մյուսներին հանձնվեցին հավաստագրեր:
Հանրապետական առաջնությանը բարձր արդյունքներ ցուցաբերած մասնակիցներից կկազմվի ՀՀ ԱԻՆ հավաքական թիմ, որը կմասնակցի առաջիկայում կայանալիք պատանի հրշեջ-փրկարարների միջազգային հավաքներին: