Խորովածը, մայոնեզը և կարագը կարող են կրծքագեղձի քաղցկեղ առաջացնել

Տեխասի (ԱՄՆ) գիտնականների մի խումբ հայտնաբերել է, որ խոլեստերինի յուրացման ընթացքում արտադրվում է մի նյութ, որը խթանում է կրծքագեղձի՝ էստրոգեն-կախյալ քաղցկեղի զարգացումը:

Գիտնականները պարզել են, որ խոլեստերինի մետաբոլիտներից մեկը՝ (27-OH) խթանում է կրծքագեղձի՝ էստրոգեն-կախյալ ուռուցքների աճը, որոնք կրծքագեղձի քաղցկեղի առավել տարածված տեսակն են: Նախկինում համարվում էր, որ այդ ուռուցքներն ակտիվանում են միայն կանացի սեռական հորմոնների միջոցով, և նույնիսկ դրա վրա է հիմնվում բուժման եղանակներից մեկը, որի ժամանակ սահմանափակվում է էստրոգենների մուտքն ուռուցքային զանգված:

Այն փաստը, որ 27-OH ոչ պակաս հաջողությամբ է առաջացնում կրծքագեղձի քաղցկեղ, մասամբ բացատրում է, թե ինչու է հորմոնալ թերապիան հաճախ անարդյունավետ լինում:

"Այս տեղեկությունը կարելի է օգտագործել կրծքագեղձի քաղցկեղի բուժման նոր եղանակներ մշակելու համար, որոնց օգնությամբ հնարավոր կլինի որևէ կերպ արգելափակել 27-OH-ի ազդեցությունը",- պատմում է բժիշկ Ֆիլիպ Շոլը՝ հետազոտության առաջատար հեղինակներից մեկը:

Յուրաքանչյուր տարի ախտորոշվում է մեկ միլիոնից ավել կրծքագեղձի քաղցկեղի նոր դեպք, որոնցից երկու երրորդն էստրոգեն-կախյալ են: Դա նշանակում է, որ ուռուցքային բջիջներն իրենց թաղանթի վրա կրում են կանացի սեռական հորմոնների՝ էստրոգենի և/կամ պրոգեստերոնի ընկալիչներ: Քաղցկեղի այս տեսակն առավել հաճախ է հանդիպում դաշտանադադարից հետո:

Բժիշկ Շոլն իր գործընկերների հետ միասին հայտնաբերել է, որ 27-OH-ը մոլեկուլյար մեխանիզմների օգնությամբ խթանում է ուռուցքի աճը, որոնք իրագործվում են՝ շրջանցելով էստրոգենային ուղին: Սկզբում դա ապացուցվեց բջջային կուլտուրաների վրա, այնուհետև՝ մկների:

Այնուհետև անցկացվեցին մի շարք փորձեր հետդաշտանադադարային փուլում գտնվող կանանց մասնակցությամբ, ովքեր բաժանվել էին երկու խմբի. առաջին խմբում կանանց մոտ ախտորոշվել էր կրծքագեղձի էստրոգեն-կախյալ քաղցկեղ, մյուսում՝ ոչ: Պարզվեց, որ առաջին խմբի կանանց կրծքագեղձի հյուսվածքներում 27-OH-ի մակարդկաը զգալիորեն բարձր էր, հատկապես՝ ուռուցքային բջիջների օջախում:

Ամենայն հավանականությամբ, դա պայմանավորված է նրանով, որ կրծքագեղձի քաղցկեղի բջիջներում CYP7B1 ֆերմենտի պարունակությունը ցածր է, իսկ դրա հիմնական ֆունկցիան հենց 27-OH-ի ոչնչացումն է: Հետագա վիճակագրական մշակման ժամանակ պարզվեց, որ կրծքագեղձի կարցինոմայով հիվանդ կանայք, ում մոտ այդ ֆերմենտի քանակությունը ցածր է, ապրելունակությունն ավելի քան 7 անգամ ցածր է: Ավելին, նախկինում ապացուցվել էր, որ էստրոգենը կարող է բարձրացնել CYP7B1 ֆերմենտատիվ ակտիվությունը: Այսպիսով, քիմիաթերապիայի տարածված այն ձևը, որի ժամանակ արգելափակվում են էստրոգենային ընկալիչները, կարող է բարձրացնել 27-OH-ի քանակությունը, և, հետևաբար, տարօրինակ կերպով խթանել կանցերոգենեզը:

"Էնդոկրին բուժում նշանակելուց առաջ CYP7B1-ի ակտիվության և 27-OH-ի քանակության որոշումը կարող է կտրուկ բարձրացնել այդ բուժման արդյունավետությունը",- համոզված է բժիշկ Շոլը:

Ուստի, օրինակ, խորոված, մայոնեզ կամ կարագ շատ ուտելուց առաջ արժե մի փոքր մտածել սեփական առողջության մասին: