«Տարվա լավագույն մանկական կատարող» ճանաչված Կարեն Օհանյանը` Ձմեռ պապիկին նամակ գրելու, իր երազանքների, ինչպես նաև 2014 թ. ակնկալիքների մասին (լուսանկարներ)

2013 թվականն իր տեղն է զիջում 2014 թվականին: Ոմանց համար 2013-ը հաջողակ, ոմանց համար պարզապես սովորական տարի էր: Սակայն, մեկ բան հաստատ է՝ յուրաքանչյուրս հավատում ենք հրաշքների, որոնք անպայման պետք է իրականանան հենց Ամանորի գիշերը: Ամանորի հետ կապված իր հիշողություններով ու դրական լիցքերով Operativ.am-ի հետ կիսվեց «Տարվա լավագույն դուետ» , ինչպես նաև «Տարվա լավագույն մանկական կատարող» պատանի երգիչ Կարեն Օհանյանը: 

Ամանորին ստացած ամենալավ նվերը, որ մինչև հիմա քո կյանքում առանձնահատուկ տեղ է զբաղեցնում:

Իմ առաջին նվերը եղել է գնացքը, որը շատ էի ցանականում ունենալ: Այն մինչև հիմա պահել եմ և շատ մեծ ուշադրությամբ, որ հանկարծ չփչանա: Այն Ձմեռ պապիկն էր ինձ նվիրել:

Իսկ նամակիդ միջոցո՞վ էիր նրան տեղեկացրել, որ գնացք ես ցանկանում ունենալ:

Այո, նամակ էի գրել, իսկ հետո տվել էի հայրիկիս և նա տարել էր փոստարկղ ու փոխանցել Ձմեռ պապիկին: Ես ամեն տարի գրում եմ նրան նամակ:

Իսկ կա՞ մի երազանք կամ ցանկություն, որ կուզենաս այս տարի իրականանա:

Շատ կուզենամ նոր տեսահոլովալներ ունենալ' ամենալավը, քան այս տարի: Ցանկանում եմ ունենալ նաև նոր երգեր և նոր հաջողությունների եմ ցանկանում հասնել:

Ի՞նչ նվերներ ես ցանկանում ստանալ այս տարի:

Այս տարի ցանկանում էի ստանալ Planshet կամ iPad: Դրա մասին ասել էի հայրիկիս: Եվ ավելի վաղ ստացա այն' մինչ Ամանոր:

Ինչո՞վ առանձնացավ և ինչո՞վ նշանավորվեց քո կյանքում 2013 թվականը:

Ունեցա առաջին դուետ' Ջուսի հետ, ինչպես նաև առաջին տեսահոլովակս: Առաջին տեսահոլովակս դուետ էր: Մասնակցեցի «Նոր ալիք» մրցույթի նախընտրական փուլին և անցա մոսկովյան փուլ, սակայն չկարողացա գնալ, քանի որ այդ շրջանում շատ զբաղված էի: Մասնակցեցի նաև «Մանկական Եվրատեսեիլին», սակայն չանցա: Այս տարի նաև իմ և Ջուսի երգը ճանաչվեց տարվա լավագույն դուետ, ինչպես նաև տարվա լավագույն մանկական կատարող ճանաչվեցի:

Սովորաբար երեխաները նույնպես անակնկալ են մատուցում  իրենց ծնողներին, իսկ դու ի՞նչ ես նախատեսել քո ծնողների համար, որպեսզի Ամանորին նվիրես:

Ես դա թողնում եմ Ամանորից հետո, քանի որ շատ զբաղված եմ լինում նկարահանումներով և չեմ հասցնում անակնկալ պատրաստել: Մայրիկիս և հայրիկիս հիմնականում նվիրում եմ օծանելիք:

Ի՞նչ կմաղթես քո երկրպագուներին և հարազատներին:

Շնորհավորում եմ բոլորի Ամանորը և ցանկանում, որ 2014 թվականը բոլորի համար լինի հաջող և ուրախություններով լի տարի, իսկ աշակերտների համար' լավ ուսումնական տարի:

Operativ.am-ի անձնակազմը շնորհավորում է Կարեն Օհանյանին և իր ընտանիքին Ամանորի կապակցությամբ՝ մաղթելով անսահման երջանկություն 2014 թվականին:

Զրուցեց` Գայանե Մելիքյանը