Իսրայելի ԱԳՆ-ն կոչ է արել «ցավոտ պատժամիջոցներ» սահմանել Իրանի նկատմամբ և ԻՀՊԿ-ին ներառել ահաբեկչական կազմակերպությունների ցուցակում

Իսրայելի արտաքին գործերի նախարարությունը կոչ է արել «ցավոտ պատժամիջոցներ» սահմանել Իրանի նկատմամբ, ինչպես նաև ներառել Իսլամական հեղափոխության պահապանների կորպուսին ահաբեկչական կազմակերպությունների ցուցակում:

Այս մասին փոխանցում է ՏԱՍՍ-ը։

Իրանի կողմից բալիստիկ հրթիռներով, թեւավոր հրթիռներով և անօդաչու թռչող սարքերով Իսրայելի վրա հարձակումից հետո Իրանի դեմ պետք է կիրառվեն ցավոտ պատժամիջոցներ։

«Իրանը պետք է վճարի իր ագրեսիայի գինը, և այդ ուղղությամբ առաջին քայլը պետք է լինի Իրանի Իսլամական հեղափոխության պահապանների կորպուսին, որն իրականացրել է այս լայնածավալ ահաբեկչությունն Իսրայելի վրա, որպես ահաբեկչական կազմակերպության անհապաղ ճանաչումը»,- ասվում է Իսրայելի ԱԳՆ-ի տարածած հաղորդագրությունում։

Հիշեցնենք,որ Իրանը շաբաթ գիշերն իր տարածքից ավելի քան 300 հարվածային անօդաչու թռչող սարք և հրթիռ է արձակել Իսրայելի ուղղությամբ, ինչն Իսլամական Հանրապետության առաջին ուղիղ հարձակումն էր Իսրայելի վրա: Իսրայելի պաշտպանության բանակի խոսնակ Դանիել Հագարին ասել է, որ ընդհանուր առմամբ Իրանը ավելի քան 300 զինատեսակ է արձակել Իսրայելի ուղղությամբ՝ 170 անօդաչու թռչող սարք, 30 թևավոր և 120 բալիստիկ հրթիռ, և որ դրանց 99%-ը որսացել է Իսրայելի հակաօդային պաշտպանությունը:

Իրանի ԱԳ նախարարը հայտարարել էր, որ Իրանի իշխանությունները 3 օր առաջ զգուշացրել են հարևան պետություններին Իսրայելի վրա առաջիկա հարձակման մասին։

ԱՄՆ նախագահ Ջո Բայդենն Իսրայելի վարչապետ Բենիամին Նեթանյահուի հետ զրույցում ասել է, որ Իրանի հարձակnւմն անհաջող էր և որ դա Իսրայելի համար հաղթանակ էր:

Մինչդեռ Իրանի նախագահ Էբրահիմ Ռաիսին հայտարարել է, որ Իսրայելի ցանկացած նոր արկածախնդրություն կարժանանա ավելի ծանր պատասխանի:

«Հետևելով մեր երկրի զինված ուժերի պատմական, հզոր և հաղթական գործողությանը՝ ապրիլի 13-ի ռազմական հարձակմանը, որը ծրագրվել և իրականացվել է ի պատասխան Իրանի Իսլամական Հանրապետության նպատակների և շահերի դեմ սիոնիստական ռեժիմի ագրեսիվ գործողությունների, Իսլամական հեղափոխության պահապանների կորպուսը, երկրի բոլոր պաշտպանական և քաղաքական հատվածների հետ համագործակցությամբ և համակարգմամբ, երեկ երեկոյան նոր էջ է բացել Իրանի հեղինակության պատմության մեջ և դաս տվել սիոնիստ թշնամուն», - ասել է Իրանի նախագահը:

Իրանի Զինված ուժերի գլխավոր շտաբի պետ, գեներալ-մայոր Մոհամադ Հոսեյն Բաղերին, մեկնաբանելով Իրանի գիշերային հարձակումն Իսրայելի վրա, հայտարարել է, որ իրենք այս գործողությունը դիտարկում են որպես արդյունք և իրենց տեսանկյունից այն ավարտվել է, այն շարունակելու մտադրություն չկա:

«Բայց եթե սիոնիստական ռեժիմը որևէ քայլ ձեռնարկի նաև մեր դեմ, մեր հողի վրա կամ Սիրիայում կամ այլ երկրում մեզ պատկանող օբյեկտներում, մեր հաջորդ գործողությունն ավելի մեծ կլինի», - նախազգուշացրել է Բաղերին: