Հայաստանի հնարավորությունները թվային փոխակերպման ոլորտում, ինչ նախապայմաններ կան․ կայացավ Doing Digital forum 2024-ը, որի ֆինթեք գործընկերը Ամերիաբանկն էր (տեսանյութ)

Տարվա թվային փառատոնը՝ Doing Digital forum 2024-ը, արդեն իրականություն է։ Ֆորումն այս տարի ներկայացավ նոր դեմքերով և թեմաներով՝ հյուրընկալելով ոլորտի համաշխարհային թոփ խոսնակներին և առաջատար փորձագետներին։ Այս տարի այն կրում էր «Հնարավորություններին ընդառաջ» խորագիրը՝ նպատակ ունենալով բացահայտել բոլոր այն լուծումները, որոնց հիմքում են թվային տեխնոլոգիաներն ու կառավարման նոր մեթոդները։

Ֆորումի կազմակերպիչը SPRING PR ընկերությունն է, ֆինթեք գործընկերը՝ Ամերիաբանկը: Վերջինս դեռ տարիներ առաջ է սկսել թվային փոխակերպման իր ճանապարհը, միայն 2023թ-ին ամերիաբանկի գործարքների 98 %-ը իրականացվել է մասնաճյուղային ցանցից դուրս՝ թվային ուղիների միջոցով։

Ամերիաբանկի մանրածախ բանկինգի տնօրեն Արման Բարսեղյանի խոսքով՝ բանկը արդեն կարող է դիրքավորվել որպես ֆինթեք ընկերություն։

Ոլորտի լավագույն մասնագետների հետ թվային փոխակերպման օրակարգը Հայաստան բերելով` Ամերիաբանկը նպատակ ունի միասին նախանշել ֆինթեքի ապագան Հայաստանում և կիսվել ոլորտի համակարգային զարգացմանն ուղղված իրենց փորձով։

Նորարարության, ֆինանսական ծառայությունների և թվային փոխակերպման փորձագետ Բրեթ Քինգը Doing Digital forum 2024-ի գլխավոր խոսնակն էր, նա վերջին տարիներին ամենապահանջված խոսնակներից մեկն է աշխարհում։ Բրեթ Քինգը իր խոսքում անդրադարձել է թվային փոխակերպման ոլորտում Հայաստանի ունեցած պոտենցիալին։ Նրա կարծիքով Հայաստանը ունի մի շարք նախապայմաններ՝ ներդրումներ ու տաղանդներ ներգրավվելու առումով։

Ֆորումի նպատակն է թվային տնտեսության տարբեր դերակատարների ջանքերով ՝ Հայաստանը դարձնել տարածաշրջանային հանգույց, որտեղ ֆինանսական տեխնոլոգիաներն ու թվային բիզնեսը կունենան լայն կիրառություն։

Ֆորումի խոսնակների թվում էր նաև Ամերիաբանկի տեղեկատվական տեխնոլոգիաների գծով տնօրեն Դավիթ Հովհաննիսյանը, ով ներկայացրեց, թե ֆինթեքի ինչ ապագա կարող է ունենալ Հայաստանը և ինչպես են զարգանում թվային տեխնոլոգիաները Հայաստանի բանկային համակարգում։

Doing Digital forum-ը ոչ միայն գիտելիքի փոխանակման, այլև միմյանց ոգեշնչելու և թվային փոխակերպումների բարդ ուղին մասնագիտական խորհուրդներով անցնելու լավագույն հարթակ է։