Թուրքիայում Հայաստանի հետ խաղին ինչպես պատերազմի են պատրաստվում

Թուրքիայի Էսքիշեհիր քաղաքում անցկացվելիք Եվրո 2024-ի նախընտրական Թուրքիա-Հայաստան ֆուտբոլի ազգային հավաքականների հանդիպմանը Թուրքիայի իշխանությունների հրահրմամբ երկրպագուները պատրաստվում են խաղին ինչպես պատերազմի։

Թուրքիայի եւ Հայաստանի ազգային հավաքականները հանդիպել են վերջին անգամ Թուրքիայում 14 տարի առաջ, երբ զուգահեռ ընթանում էր Հայաստանի հետ հարաբերությունների կարգավորման գործընթաց, ինչը որ նաեւ հիմա է այսպես ասած ընթանում։

Սակայն եթե նախորդ անգամ Թուրքիայում Հայաստանի հետ խաղից առաջ իշխանությունները երկրի ներսում լրատվամիջոցների եւ տեղական ինքնակառավարման մարմինների միջոցով Հայաստանի նկատմամբ դրական ֆոն էին ստեղծել, սկսած Հայաստանի մասին դրական ռեպորտաժներից մինչեւ պաշտոնյաների դրական հայտարարությունները, ապա այս անգամ լրիվ այլ իրականություն էր խաղից առաջ։

Այս անգամ լրատվամիջոցներում իսպառ բացակայում էին Հայաստանի նկատմամբ որեւէ դրական կամ սպորտային բնույթի հրապարակումներ։ Ավելին, Թուրքիայի ֆուտբոլի ֆեդերացիան ոչ սպորտային վարք է դրսեւորել, հայտարարելով, որ ռեկորդային քանակությամբ Թուրքիայի դրոշ են բաժանելու տրիբունաներ, իսկ լուսատախտակին էլ Թուրքիայի հանրապետության ստեղծման 100-ամյակին նվիրված շոու է ցուցադրվելու։

Ավելին, Թուրքիայի նախագահը խաղից 2 օր առաջ Հայաստանին մեղադրեց սադրիչ քայլերից մեջ։ Իսկ թուրքական լրատվամիջոցները ամեն օր ադրբեջանական մամուլի հրապարակած ապատեղեկատվություններն են տարածում, իբր Հայաստանը կրակ է բացել Ադրբեջանի տարբեր շրջաններում խաղաղ բնակիչներ կամ դիրքերի ուղղությամբ։

Այս մթնոլորտից լրջորեն ազդված են նաեւ թուրք երկրպագուները, ովքեր իրենց գրառումներում սոցկայքերում կամ լրատվամիջոցների հարցազրույցներում խաղը որպես պատերազմ են ընդունում Հայաստանի դեմ։

Այս ամենը խիստ տարօրինակ է, երբ երկիրը իբր Հայաստանի հետ հարաբերությունների կարգավորման է գնում, սակայն իր հասարակությանը հրահրում է Հայաստանի դեմ, մոռանալով սպորտի ոսկե կանոնները, որ սպորտը եւ քաղաքականությունը չի կարելի խառնել իրար։