3 բնակարան Երևանում, հողամաս Վարդենիսում. ինչ ունեցվածք է հայտարարագրել Թագուհի Թովմասյանը

ՀՀ Ազգային ժողովի ընդդիմադիր՝ «Պատիվ ունեմ» խմբակցության պատգամավոր Թագուհի Թովմասյանը 2023 թվականի մայիսի 30-ին Կոռուպցիայի կանխարգելման հանձնաժողով է ներկայացրել 2022 թվականի իր գույքի և եկամուտների տարեկան հայտարարագիրը:

Ըստ այդմ՝ Թովմասյանը հայտարարագրել է 3 բնակարան, որոնք գտնվում են Երևանում, դրանցից երկուսը միանձնյա սեփականություն է, մեկը՝ համատեղ։

Վերջինս Գեղարքունիքի մարզի Վարդենիս համայնքում ունի նաև համատեղ սեփականությամբ հողամաս։

Շարժական գույք ընդդիմադիր պատգամավորը չի հայտարարագրել:

Որպես դրամական միջոց՝ Թովմասյանը հայտարարագրել է 1 միլիոն 723 հազար 278 դրամ, որը տարեվերջին դարձել է 1 միլիոն 710 հազար 982.4 դրամ։

Նրա կանխիկ միջոցները կազմել են 6 միլիոն 500 հազար դրամ, որը տարեվերջին դարձել է 5 միլիոն 300 հազար դրամ, և 2 հազար 500 եվրո, որը տարեվերջին պահպանվել է։

Տարվա ընթացքում Թովմասյանի ընդհանուր եկամուտները կազմել են 10 միլիոն 677 հազար 830 դրամ, որից 7 միլիոն 722 հազար 830 դրամը վերջինս ստացել է ԱԺ աշխատակազմից՝ որպես աշխատավարձ, իսկ 2 միլիոն 955 հազար դրամը՝ «Ժողովուրդ թերթի խմբագրություն» ՍՊԸ-ից։

Թագուհի Թովմասյանը նաև ունի վարկ, որի մայր գումարի մնացորդի չափը կազմում է 45 միլիոն 562 հազար 632.9 դրամ։