Ի՞նչ արժե մեկ աչքը. Անդրանիկ Մանուկյան (լուսանկարներ)

Հոկտեմբերի 27-ի ոճրագործությունը ստիպեց մի շարք քաղաքական գործիչների հանել դիմակները և ցույց տալ իրենց իրական ողորկ ինքնությունները: Թերևս իր կերպարանափոխման ֆենոմենով ամենատպավորիչը Ազգային ժողովի պատգամավոր Անդրանիկ Մանուկյանն էր՝ Սերվիզի Անդոն: Ինչպես բազմաթիվ ներկայիս գործող պաշտոնյաներ, այնպես էլ Անդրանիկ Մանուկյանն իր կենսագրության միջից հանել է այն փաստը, որ նա ժամանակին եղել է ՀՀՇ անդամ: Եվ, չնայած 1998թ. իշխանափոխությունից հետո Ա. Մանուկյանը հրապարակավ բազմիցս ասել էր, որ երբեք ՀՀՇ անդամ չի եղել, սակայն նախկին իշխանության ներկայացուցիչները, ի պատասխան մեր հարցմանը, հաստատեցին, որ Անդրանիկ Մանուկյանը ոչ միայն ՀՀՇ անդամ է եղել, այլ նաեւ եղել է ՀՀՇ-ին անմնացորդ նվիրված ամենաակտիվ անդամներից մեկը: Այս մասին գրում է Nrnak.com-ը: 

Ինչևիցե, երկրորդ նախագահը գնահատեց «փոխակերպուկի» առանձնահատկությունները և թույլ տվեց նրա աճը թե՛ քաղքականության ոլորտում, թե՛ կարողությունների: Մամուլը բազմիցս նշել է Անդրանիկ Մանուկյանի տրամադրության տակ գտնվող այնպիսի հնարավորությունների մասին, որոնք անհասանելի են շատ պաշտոնյաների համար: ԱԺ նախագահ Հովիկ Աբրահամյանի հրահանգով արդեն երկար տարիներ Անդրանիկ Մանուկյանի տրամադրության տակ է գտնվում ԱԺ-ում հաշվառված 052 օօ 01 ավտոմեքենայի համարանիշը։ Սա ինքնիրավչության կոպիտ դրսևորում է, քանի որ այսպիսի համարանիշ ունենալու իրավունք ունեն բացառապես Աժ հանձնաժողովների նախագահներն ու խմբակցությունների ղեկավարները։

Բացի դրանից Անդրանիկ Մանուկյանն ամուր կերպով կառչեց Ռոբերտ Քոչարյանին' նրա հետ ստեղծելով քավոր-սանիկ նորագույն փիլիսոփայական կապը:

Իր արտոնությունները հոյակապ օգտագործելով' այժմ էլ Ուկրաինայում Հայաստանի արտակարգ և լիազոր դեսպան Անդրանիկ Մանուկյանը կարողանում է իր ունեցվածքն ու կարողությունները բարձրացնել նոր փուլ: Նորք Մարաշի իր դղյակով չբավարարվելով՝ նա, առանձնատնից մոտ մեկ կիլոմետր հեռավորության վրա, սկսել է նոր «կալվածքի» շինարարությունը, որն ամբողջությամբ փակել է հետիոտների համար նախատեսված մայթը: Բացի այդ իր առանձնատան մուտքի առաջ կայանված «Lexus» մակնիշի մեքենայի պետհամարանիշը' 01 RR 001, արժե 8 միլիոն դրամ:

Իսկ բիզնեսի տեսանկյունից մեզ հաջողվեց պարզել, որ Չարբախում գտնվող գազալցակայանն իր նորանշանակ տնօրենով պատկանում է Անդրանիկ Մանուկյանին: Ընդ որում նշենք, որ գազալցակայանի տնօրենն ապօրինի շինարարական աշխատանքներ ծավալելու համար ենթարկվելու է վարչական տույժի: Ա. Մանուկյանի հնարավորություններն այսքանով չեն սահմանափակվում: Երկրի ղեկավարության և Անդրանիկ Մանուկյանի «անկեղծ սերը» այնքան խորացավ, որ Ա.Մանուկյանին պատկանող «Մետրոպոլ» հյուրանոցը դարձավ միջպետական մակարդակի հյուրերի հիմնական հանգրվանը:

Անդրանիկ Մանուկյանի այս արտոնություններն ու հնարավորությունները հիշեցնում են մանուկ տարիների մի արտահայտություն՝ «կուզեի՞ր մեկ աչքանի լինեիր, բայց ունենայիր անսահմանափակ հնարավորություններ»: