«Խայտառակություն է Հայաստանի համար». «Քրդական ժողովրդական պաշտպանության ուժեր»-ը՝ իր անդամներին թուրքերին արտահանձնելու մասին

Հայաստանը խախտել է իր և միջազգային օրենքները՝ Թուրքիային փոխանցելով Քրդստանի աշխատավորական կուսակցության երկու անդամների։ Այս մասին ասվում է Քրդական ժողովրդական պաշտպանության ուժերի տարածած հայտարարության մեջ:

Ինչպես հաղորդում է քրդական ANF գործակալությունը, հայտարարության մեջ Քրդական ժողովրդական պաշտպանության ուժերը հայտնել են, որ Աթիլլա Չիչեքը և Հուսեյն Յըլդըրըմը Հայաստանից արտահանձնվել են Թուրքիա:

Նշվում է, որ վերջիններս «Հայաստանի հետ սահմանի շրջանում բախվել են հայկական պետության ուժերի հետ 2021 թվականի օգոստոսին, բացասական իրավիճակը կանխելու համար կշռադատված են գործել, սակայն ձերբակալվել են, կալանավորվել և նրանց մեղադրանքներ են առաջադրվել»:

«Մեր ընկերները 2022թ. փետրվարի 23-ին կանգնել են Հայաստանի Վերաքննիչ դատարանի առջև, որը որոշում է կայացրել ազատ արձակել նրանց։ Միջազգային և հայկական օրենսդրության համաձայն՝ նրանք պետք է ազատ արձակվեին։ Փոխարենը նրանք առևանգվել և ձերբակալվել են Հայաստանի գաղտնի ծառայության կողմից։

Չնայած խոստացել էին նրանց ազատ արձակել նշված միջոցառումների ընդունումից հետո, սակայն նրանց Հայաստանից Թուրքիա են արտահանձնվել մոտ մեկ ամիս առաջ»,-ասվում է հայտարարության մեջ։

Հայտարարության մեջ ասվում է նաև. «Ցեղասպանության ձգտող Թուրքիային քուրդ հեղափոխականների այսկերպ փոխանցումը խայտառակություն է Հայաստանի համար: Այդ քուրդ հեղափոխականները պայքարում են իրենց ժողովրդի գոյության և ազատության համար ու ցավում բոլոր ճնշված ժողովուրդների համար»:

Ըստ ՀՀ դատական տեղեկատվության համակարգում հրապարակված տեղեկության՝ վերոնշյալ անձանց մեղադրանք է առաջադրվել 2021թ. օգոստոսի 16-ին Արաքս գետով ՀՀ սահմանն ապօրինի հատելու և զենք-զինամթերքի մաքսանենգության համար:

Սյունիքի մարզի առաջին ատյանի դատարանը 2022թ. հունվարին նրանց դատապարտել է 7 տարվա ազատազրկման, ավելի ուշ Վերաքննիչ դատարանը կրճատել է ազատազրկման ժամկետները՝ պայմանական ազատազրկում՝ 3 տարի փորձաշրջանով: