Պարարվեստի պետական քոլեջի տնօրեն Արմեն Գրիգորյանին հեռացրել են աշխատանքից. պարզաբանում է տնօրենի կինը

Երևանի Պարարվեստի պետական քոլեջի տնօրեն Արմեն Գրիգորյանը հեռացվել է աշխատանքից: Նրա հեռացման հրամանը ստորագրել է ՀՀ մշակույթի նախարար Հասմիկ Պողոսյանը:

Երբ փորձեցինք այս լուրը ճշտել Արմեն Գրիգորյանից, հեռախոսազանգին պատասխանեց նրա կինը` Մարինա Գրիգորյանը՝ ասելով, որ ամուսինը զբաղված է, և ինքը կպատասխանի բոլոր հարցերին: Տիկին Գրիգորյանը  նույն դպրոցում դասական պար է դասավանդում: «Այո, պարոն Գրիգորյանին հեռացրել են աշխատանքից  և շատ անարդար»,- նշեց Մարինա Գրիգորյանը:

Իսկ այն հարցին` ճիշտ են այն լուրերը, որ դպրոցի տնօրենը ուսանող է ծեծել, որն էլ հեռացման պատճառ է դարձել, տիկին Գրիգորյանը մասամբ հերքեց: «Սո'ւտ է,- Operativ.am-ի թղթակցի հետ զրույցում ասաց նա և ավելացրեց,- այդ ուսանողը խուժանություն է արել միջանցքում: Ես և մի ուսուցչուհի միջանցքով անցնում էինք, այդ երեխան, որը 15 տարեկան հասուն տղա է, (մեզ պարի շարժումներ ունենք, որ բաց ոտքերով թռիչք են անում օդում), գալիս  և մեր գլխի վերևը փորձում է անել: Մենք շատ արագ էինք քայլում, եթե դանդաղ քայլեինք, հաստատ նրա ոտքը կկպներ ինձ: Այդ ուսանողը նորից է շարժումը կատարում, և դա տեսնում է տնօրենը, քաշում է մի կողմ, որովհետև դա մեր մոտ համարվում է խուժանություն, նորմալ մարդ չի կարա ուրիշի գլխի վերևը փորձի թռնել: Քաշում է մի կողմ, ասում է` ինչ ես անում, այ սենց` վզին ոնց են մի թեթև հարվածում, մենք բոլորս տեսել ենք, այդքանը:  Հետո նրա մայրը եկավ, ասաց, որ մենք ամբողջ ցեղով նրան ծեծել ենք»:

Մարինա Գրիգորյանի հավաստմամբ`  այս պատմությունը ոմանց ձեռնտու էր, սակայն հեռացման հրամանում աշխատանքից ազատման այլ պատճառ է նշված: «Մի մարդ, որ մաքրության կերպար է, ո'չ գողություն է արել, ո'չ` մի ուրիշ բան, առավոտյան գալիս է գործի և նրան թուղթ է գալիս, ապսուրդ մեջը գրած, իբր` տնօրենը հաճախակի է բացակայում աշխատանքից, գրեթե չի գալիս: Մեր փաստաբանը նայեց ու ասեց, որ հանգիստ կարող է դատի դալ և վերականգնվել» ,- վրդովված նշեց Պարարվեստի պետական քոլեջի տնօրեն Արմեն Գրիգորյանի կինը: Նրա խոսքերով` աշխատանքի վայրում ամուսինը կոնֆլիկներ չի ունեցել, այդ ուսանողի հետ նախկինում նման միջադեպեր չի եղել, իրենց  ուսանողները որոշել են բողոքել այս անարդարության դեմ:

Մարինա Գրիգորյանը նշեց նաև, որ մշակույթի նախարարության հետ մշտապես կոնֆլիկտների մեջ է: «Մեր դպրոցը 3-րդ տարին է՝ վերանորոգվում է, երեխաները փոշիների մեջ, եթե ասթմատիկ չդառնան,  լավ կլինի, պատկերացրեք` աղջիկները կուպալնիկներով:   Բալետային դպրոց է, բայց  գաջ, ցեխ, հող,  3 ամիս էլ զուգարան  չունեինք, պարզ է, որ իմ ամուսինը չի կարող դրան փակ աչքերով նայել: Բերել են մանկապարտեզների  զուգարանակոնքերից, որոնց  բաչոկները չէր աշխատում, իսկ հիմա էլ պահն է գալիս, որ պիտի ստորագրի, որ ընդունվել է այդ վերանորոգումը, իսկ Արմեն Գրիգորյանը ասել է, որ չի ստորագրի: Այս պատմությունը սարքել են, որ նա ստորագրի այդ փաստաթղթերը»,- մեզ հետ զրույցում ասաց Մարինա Գրիգորյանը:

Վերջինիս խոսքերով` իրենք դասի չեն գնա այնքան ժամանակ, մինչև այս հարցը չփակվի: Իսկ եթե իր ամուսինը պաշտոնում չվերականգնվի, ինքն էլ դուրս կգա դպրոցից: «Մենք բարձրակարգ մասնագետներ ենք, տարբեր տեղերից հրավերներ ունենք, բայց մենք մնացել ենք Հայաստանում, որ մեր բալետը օպերայից տարբերվի, հասցնենք եվրոպական մակարդակի, սակայն, պարզվում է, որ դա Հայաստանին պետք չի»,- ասելիքն ամփոփեց տիկին Գրիգորյանը:

Պարարվեստի պետական քոլեջի գործավարուհին մեզ հետ զրույցում նշեց, որ տնօրենը միշտ էլ աշխատանքի է եկել, բացառությամբ՝ հիվանդ օրերի:

Արմեն Գրիգորյանի՝ աշխատանքից հեռացնելու պաշտոնական պատճառները քիչ ուշ կհայտնեն Մշակույթի նախարարության հասարակայնության հետ կապերի բաժինից: