Մակրոնն ընդունում է ԱՄԷ առաջնորդին՝ էներգակիրների մատակարարումներ ապահովելու համար

Ֆրանսիայի նախագահ Էմանուել Մակրոնն ընդունում է Արաբական Միացյալ Էմիրությունների առաջնորդին, որպեսզի էներգակիրների մատակարարումներ ապահովի, քանի որ Եվրոպան պատրաստվում է ուկրաինական պատերազմի պատճառով պատժամիջոցներից հետո ռուսական բնական գազի մատակարարումների ամբողջական դադարեցման հնարավորությանը:

Մուհամմեդ բեն Զայեդ Ալ Նահայանը Փարիզում է՝ իր առաջին պետական այցով Ֆրանսիա, հայտնում է AP-ն։

Ֆրանսիան հատկապես սերտ կապեր ունի ԱՄԷ-ի հետ, եւ երկու առաջնորդների միջեւ վերջին տարիներին անձնական հարաբերություններ են հաստատվել: Անձնական շփումն արդյունք տվեց անցյալ տարի Աբու Դաբի Մակրոնի կատարած պաշտոնական այցի ժամանակ, երբ 16 միլիարդ եվրոյի զենքի գործարք կնքվեց՝ զենքի արտահանման ֆրանսիական ամենամեծ պայմանագիրը պատմության մեջ:

Երկու առաջնորդները կկենտրոնանան Ուկրաինայի պատերազմի եւ, դրա հետ կապված, Ֆրանսիայի ու Եվրոպայի համար էներգակիրների մատակարարման խնդիրների վրա, ասել է Ֆրանսիայի նախագահի ներկայացուցիչը։

Պաշտոնյան հավելել է, որ Մակրոնը եւ Շեյխ Մուհամմեդը «աշխատում են ածխաջրածինների եւ ածխաջրածինների մատակարարումների երաշխիքների վերաբերյալ երկկողմ համաձայնագիր ստորագրելու ուղղությամբ»։

Մակրոնն անցյալ շաբաթ ասել է, որ իր կառավարությունը «սթափության ծրագիր» կպատրաստի էներգիան խնայելու համար, իսկ Ֆրանսիան շարունակում է ուղիներ որոնել գազի աղբյուրները դիվերսիֆիկացնելու համար։ Նա կոչ է արել ավելի արագ անցում կատարել օֆշորային հողմային էլեկտրակայաններին եւ ընդլայնել եվրոպական միջսահմանային էներգետիկ համագործակցությունը, «քանի որ մենք պատրաստվում ենք մի սցենարի, որի դեպքում ստիպված կլինենք ապրել առանց ամբողջ ռուսական գազի»:

Ֆրանսիայի ֆինանսների նախարար Բրունո Լը Մերն անցյալ ամիս հայտարարել էր, որ երկիրը բանակցություններ է վարում ԱՄԷ-ի հետ նավթի եւ դիզելային վառելիքի մատակարարումների շուրջ՝ «ռուսական վառելիքին այլընտրանք» գտնելու համար։