Ժողովրդի թիկունքում ձեռք են բերել պայմանավորվածություն՝ Բերձորը հանձնելու կապակցությամբ․ Սաղաթելյան

Արցախ -Հայաստան ճանապարհային շինարարությունն ճակատագրական խնդիր է։ Այս մասին Ֆրանսիայի հրապարակում «Դիմադրություն» շարժման հանրահավաքի ընթացքում ասաց «Հայաստան» խմբակցության պատգամավոր Իշխան Սաղաթելյանը։

Նա մեջբերելով Նոյեմբերի 9-ի հայտարարության 6-րդ կետը, նշեց, որ այնտեղ գրված է՝ Լաչինի 5 կմ լայնությամբ միջանցքն ապահովելու է ԼՂ կապը Հայաստանի հետ, ընդ որում՝ շրջանցելով Շուշի քաղաքը, մնում է ՌԴ խաղաղապահ զորակազմի հսկողության ներքո։

«Կողմերի համաձայնությամբ, ԼՂ-ի և Հայաստանի միջև կապ ապահովելու համար առաջիկա երեք տարիների ընթացքում պետք է հաստատվի Լաչինի միջանցքի երկայնքով նոր երթուղու կառուցման նախագիծ,որից հետո ռուսական խաղաղապահ զորակազմը կվերատեղակայվի այդ երթուղին պաշտպանելու համար»,- ընթերցեց քաղաքական գործիչն ու մի քանի հարցեր բարձրացրեց․

«1․ ԼՂ և ՀՀ միջև կապն ապահովելու համար Լաչինի միջանցքի երկայնքով նոր երթուղու կառուցման նախագիծը պետք է հաստատվեր կողմերի համաձայնությամբ։ Ե՞րբ, որտե՞ղ, ի՞նչ պայմաններում և ի՞նչ մակարդակով է ձեռք բերվել այդ համաձայնությունը։ Կա արդյոք համաձայնություններ և դրանք ստորագրված են։ Մենք պնդում ենք, որ այս իշխանությունները, կրկին ժողովրդի թիկունքում, ձեռք են բերել պայմանավորվածություն՝ Բերձորը հանձնելու կապակցությամբ։ Կա նաև լրացուցիչ ճանապարհային քարտեղ,որի մասին հայ ժողովուրդը տեղյակ չէ։

2․ Երեք տարիների ընթացքում պետք է հաստատվեն երթուղու կառուցման նախագիծը, այնինչ՝ 20 ամիս անց Ադրբեջանը կառուցել է 32 կմ ճանապարհահատված և արագացված ընթացքով փորձում է առաջ մղել իր շահերը։ Ում է ձեռնտու այս շտապողականությունը, ինչո՞ւ է շտապում ՀՀ-ն։

3․ ԱՀ-ի և ՀՀ-ի միջև նոր ճանապարհը ենթադրում է նոր կոմունիկացիաներ՝ գազամուղ, էլեկտրական հաղորդալար, հեռահաղորդակցության մալուխ, ինչպե՞ս և ի՞նչ ժամկետներում են լուծվելու այս հարցերը։Ո՞ւմ իրավասության ներքո են լինելու այդ ենթակառուցվածքները և դրանց շահագործման պայմանները։

4․ Ինչպե՞ս են կառավարվելու ամայի տարածքներով անցնող նոր ճանապարհի սպասարկման և անվտանգության հետ կապված ռիսկերը։ որքանով է երաշխավորված լինելու Արցախի հետ ՀՀ-ի անխափան ցամաքային կապը։

5․Նոյեմբերի 9-ի հայտարարության մի շարք պարտավորություններ սահմանվում է ոչ միայն Հայաստանի, այլև Ադրբեջանի համար։ Վերջինս այս ընթացքում ոչ միայն չի կատարել իր ստանձնած պարտավորությունների զգալի մասը, այդ թվում՝ 8-րդ կետով ամրագրված ռազմագերիների, պատանդների և պահվող այլ անձանց փոխանակելու մասով, այլև բացահայտ խախտել է նույն համաձայնագրի հենց առաջին կետը, որտեղ հստակ նշվում է ՝ զինադադարից հետո կողմերը պետք է կանգ առնեն զբաղեցրած դիրքերում։ Բայց դրանից հետո, բոլորս գիտենք, թե քանի տարածքներ ենք կորցրել՝ Խծաբերդը, Փառուխը, Գորիս-Կապան ճանապարհը և թշնամին դեռ շարժվում է առաջ։ Ինչո՞ւ և ինչպե՞ս է ստացվում , որ Նոյեմբերի 9-ի հայտարարության բոլոր կետերը հայկական կողմը հետևողականորեն իրականացնում է, իսկ այն կետերը, որոնք վերաբերում են Հայաստանին, չեն իրականացվում Ադրբեջանի կողմից։ Այս հարցն ունի մեկ պատասխան՝ Կառավարության շենքում նստած են դավաճաններ, որոնք սպասարկում են Ադրբեջանի շահերը և կապ չունեն մեր ժողովրդի հետ»։