Պաշտոնը ստանձնելիս անձնական շահեր չեմ հետապնդել. Արամ Թանանյան

ՀՀ կառավարության հունիսի 17-ի նիստին որոշվեց «Վերին Լարս» անցակետում ՀՀ մաքսային կցորդի պաշտոնից ազատել Արամ Թանանյանին, ով այդ պաշտոնում աշխատել է 2.5 տարի։

Կառավարությունը որոշման պատճառների մասին դեռ չի հայտնում:
NEWS.am-ի թղթակցի հետ զրույցում Թանանյանը դժվարացավ պատասխանել որոշման պատճառների մասին հարցերին։

«Իմ նշանակման մասին որոշումը կայացրել է ՀՀ կառավարությունը, նույն կառավարությունն էլ նպատակահարմար է համարել ինձ ազատել զբաղեցրած պաշտոնից։ Ես պետական ​​ծառայող եմ։ Ինչ պաշտոնի նշանակեն, այնտեղ էլ կաշխատեմ: Միշտ պատրաստ եմ տեսակետների, մոտեցումների, չափանիշների փոփոխությունների։ Պետական ծառայողի համար դա սովորական երեւույթ է»,- ասաց նա։

Թանանյանը պատրաստակամություն հայտնեց ցանկացած աշխատանքի այն պաշտոնում, որին կառավարությունը նպատակահարմար կհամարի իրեն նշանակել։ «Իմ կյանքում դա տեղի է ունեցել գրեթե մեկ տասնյակ անգամ՝ տարբեր պատճառներով, տարբեր հարցերի պատճառով։ Ես բիզնեսմեն չեմ, երբեք բիզնեսով չեմ զբաղվել, անձնական շահեր չեմ հետապնդել ո՛չ որեւէ պաշտոնը ստանձնելիս, ո՛չ էլ հեռանալիս։ Աշխատանքն այնտեղ է, որտեղ ինձ նշանակել են: Չեմ ուզում խորանալ այդ հարցի մեջ, անփոխարինելի մարդիկ չկան։ Ամեն դեպքում, ռոտացիան պարտադիր է, որպեսզի կադրերն իրար փոխարինեն։ Ղեկավարության որոշումները երբեք չեմ մեկնաբանել:

Ինչ վերաբերում է իմ աշխատանքի գնահատականներին, ապա դա կարող են անել ՀՀ պետական ​​եկամուտների կոմիտեն, ռուս մաքսավորները եւ այլ կառույցներ, որոնց հետ ես աշխատել եմ։

Հայկական կողմից տեսանելի էին միայն իրականացված աշխատանքների արդյունքները, իսկ թե ինչպե՞ս են այդ արդյունքները ձեռք բերվել, հնարավո՞ր էր ավելի լավ եւ արդյունավետ անել՝ դա այլ հարց է։ Միշտ կարելի է ինչ-որ բան փոխել եւ կատարելագործել»,- ընդգծեց նա։

Նշենք, որ Արամ Թանանյանը վերոնշյալ պաշտոնում նշանակվել էր 2020 թ. հունվարի 30-ին։ Նա մշտապես սերտ կապի մեջ է եղել ԶԼՄ-ների հետ եւ թարմ տեղեկություններ է հայտնել «Վերին Լարս» անցակետում իրավիճակի մասին։