Տաքսու վարորդներին կրկնակի են խաբել. Եթե մարդը չի ուզում այլեւս տաքսի վարել, ստիպված է էլի տաքսու ԱՊՊԱ անել. վարորդ

Տաքսու վարորդներին կրկնակի են խաբել. մարդիկ, որոնք նախորդ տարի սեզոնային տաքսի են վարել, ԱՊՊԱ պայմանագրի ժամկետը լրացել է, նոր պայմանագիրը արդեն փորձում են կնքել սովորական, ոչ որպես տաքսի ու չի ստացվում, ստիպված են էլի տաքսու ԱՊՊԱ անել: Այս մասին, այսօր՝ փետրվարի 7-ին, Հայաստանի ավտոապահովագրողների բյուրոյի դիմաց բողոքիա ակցիայի ժամանակ լրագրողների հետ զրույցում նշեց «ՏՈՒԳԱՆՔ» նախաձեռնության ղեկավար Արտակ Խաչատուրովը՝ հավելելով, որ այդպիսի վարորդները մեծ թիվ են կազմում եւ նրանց համար, ըստ էության, ԱՊՊԱ-ն թանկացել է:

«ԱԺ-ում կայացած հանդիպմանը իմացանք, որ էլի են փոփոխություններ լինելու, որոնց մասին էլի տեղյակ չենք: Երեւի ուժի մեջ մտնելուց հետո կիրազեկվենք:

Երկրորդ «լավ» նորություններից մեկն այն է. Որ եթե նախկինում նվազ վնաս պատճառելու դեպում ԱՊՊԱ վճարը 3 միավոր էր բարձրանում: Հիմա շուստրիություն են արել, այդ երեք միավորը նախկին 4 միավորի տոկոսներից բարձր է կազմում: Գումարային առումով էլ ավելի թանկ է նստում: Ամեն ինչ տրել է թանկացման, այդ փաթեթը ոչ մի նվազեցում չի պարունակում բարեխիղճ վարորդների համար»,-ասաց նա:

Արտակ Խաչատուրովը նշեց, որ ապահովագրողների բյուրոյին հանգիստ են թողնելու, անցնելու են այն չինովնիկներին, որոնք ուղղակի կամ անուղղակի կարող են ազդեցություն ունենալ Ապահովագրողների բյուրոյի եւ ԿԲ-ի վրա. «Մենք ունենք ակցիաների ծավալը մեծացնելու խնդիր, որ մարդիկ տեղից շարժվեն»:

Նա հավելեց, որ իրականում ապահովագրական ընկերությունները այս քայլին գնում են ստիպված, որովհետեւ մեծ փողեր են վճարում թե ԱՊՊԱ բյուրոյի ծախսերի համար, թե իրենց կողմից մոգոնած ծրագրային ապահովման համար. «Մենք կողմնակից ենք, որ ապահովագրական ընկերությունները նորմալ շահույթով աշխատեն: Մենք ասում ենք՝ բերեք մենք մատնացույց անենք, դուք այդտեղ կրճատումներ արեք, որից հետո տակն ինչ կմնա, վարորդների վզին կփաթաթեք»,-ասաց Խաչատուրովը:

Ավելի վաղ հայտնել էինք, որ ԱՊՊԱ վճարների բարձրացումն ուժի մեջ է մտել փետրվարի 7-ից: Հունվարի 31-ին, փետրվարի 3-ին ու փետրվարի 7-ին եւս վարորդները բողոքի ակցիա էին իրականացրել Հանրապետության հրապարակում եւ ԿԲ շենքի մոտ՝ իրենց բողոքն արտահայտելով ԱՊՊԱ վճարների թանկացման դեմ: Նրանք իրենց մեքենաներով ազդանշանները միացրած պտտվել էին Հանրապետության հրապարակում: Ոստիկանները երկու դեպքում էլ բերման էին ենթարկել վարորդներից մի քանիսին:

Նշենք, որ ըստ այդ փոփոխությունների ԱՊՊԱ-ի վճարը թանկանում է 3 հազար դրամով: Բացի դրանից, եթե վթար է լինում, որի վնասը անցնում է 1 մլն դրամը, ապա մալուսային համակարգը բարձանում է ութ դասով: Մալուսային համակարգի ամենաբարձր շեմը 300 տոկոսն է։