ԼՂ կարգավիճակի հանրաքվեն 1988թ․ համամասնությամբ անցկացնելու մասին կետը 2016թ․ փաստաթղթերից անհետացել է․ ԱԽ քարտուղար

Սերժ Սարգսյանը փորձում է մանիպուլյացիա անել․ եթե նրա համար ինքնորոշման իրավունքն ու Ղարաբաղի կարգավիճակը հարցերը կարեւոր էին, ինչո՞ւ է համաձայնել, որ կարգավիճակի հարցը իրենց կողմից (Հայաստանի եւ Ադրբեջանի միջեւ – խմբ․) ստորագրվող փաստաթղթից դուրս գա եւ գնա ՄԱԿ-ի Անվտանգության խորհուրդ, միջանկյալ կարգավիճակի մասին էլ արտգործնախարարներն իրենց հայտարարություններում նշեն, որը ոչ թե պարտավորեցնող դրույթ է, այլ նշված է եղել, որ կաջակցեն դրան։ Այս մասին Factor.am-ին տված հարցազրույցում ասել է ՀՀ ԱԽ քարտուղար Արմեն Գրիգորյանը՝ անդրադառնալով ՀՀ երրորդ նախագահ Սերժ Սարգսյանի՝ իր վերջին հարցազրույցում արցախյան կարգավորման բանակցային գործընթացի վերաբերյալ վարչապետ Նիկոլ Փաշինյանի պնդումներին ի պատասխան հնչեցված հայտարարություններին։

«Եթե Կազանի փաստաթղթում 1-ին եւ 2-րդ կետերը ինքնորոշման իրավունքի եւ միջանկյալ կարգավիճակի մասին էին, ինչո՞ւ է Սերժ Սարգսյանը համաձայնվել, որ 2016թ․ փաստաթղթերում դրանք նախ չլինեն որպես կետեր՝ ինքնորոշման իրավունքի իրացման մասին կետեր գոյություն չունենան, բայց նաեւ այնպիսի ձեւակերպումներ լինեն, որ կողմերը պետք է համաձայնվեն, եւ չի հստակեցվում։ Սերժ Սարգսյանը նաեւ մեկ բան շատ լավ գիտի՝ Կազանյան փաստաթղթում նշված է, որ հանրաքվեն տեղի է ունենալու ԼՂ բնակչության՝ 1988թ․ համամասնությամբ։ 2015-16թթ․ նման կետ արդեն չի եղել, թե որ տարածքներում էր այդ հանրաքվեն տեղի ունենալու, դա եւս, կարելի է ասել, լղոզված էր շատ։ Երբ 1988թ․ բնակչության համամասնության կետը հանվել է փաստաթղթերից, Սերժ Սարգսյանն էլ է շատ լավ հասկացել՝ ինչ է կատարվում, եւ նա նամակ ունի գրած։ Սերժ Սարգսյանի խորհուրդ կտայի, կառաջարկեի, որ հրապարակի իր գրած նամակը։ Դրանում խնդրում է, որպեսզի 1988թ․ համամասնության կետը հետ բերեն, այդպիսի խնդրանք է ձեւակերպել։ Երբ բնակչության համամասնության կետը դուրս է եկել, Ադրբեջանը կարող էր դա ցանկացած ձեւով ինտերպրետացիայի ենթարկեր, որովհետեւ հանրաքվեի անցկացման տարածքի եւ բնակչության համամասնության մասով հստակություն չկար։ Եթե Սերժ Սարգսյանն անկեղծություն ունենա, պետք է իր այդ նամակը հրապարակի՝ ցույց տալու, թե ինչ ողբերգություններ են տեղի ունեցել»,- ասաց Գրիգորյանը։