Դիմում ենք ՌԴ-ին 1997-ի պայմանագրի շրջանակում ՀՀ տարածքային ամբողջականությունը պաշտպանելու կոչով. ԱԽ քարտուղար

Ժամը 13։00-ի դրությամբ ադրբեջանական զինված ուժերը ռազմական գործողություններ են սկսել և փորձել են սրել իրադրությունն հայ-ադրբեջանական սահմանի արևելյան ուղղության ամբողջ երկայնքով: Այս մասին, այսօր՝ նոյեմբերի 16-ին, «Լուրեր»-ի եթերում ասել է Հայաստանի անվտանգության խորհրդի քարտուղար Արմեն Գրիգորյանը։

«Այս պահին շարունակվում են մարտական գործողություններ ընթանալ. Պաշտպանության նախարարությունը քայլեր է ձեռնարկում իրավիճակը կայունացնելու նպատակով», - ասել է Գրիգորյանը։

Նրա խոսքով՝ այսօրվա սրացումը կապված է նաև Ադրբեջանի կողմից հավելյալ զրահատեխնիկա և զինված ուժեր կիրառելու հետ. «Նրանք փորձել են օգտագործել Հայաստանի սուվերեն տարածքում գտնվող Ադրբեջանի զինված ուժերը։ Քանի որ հարձակումը եղել է Հայաստանի սուվերեն տարածքի վրա, մենք դիմում ենք Ռուսաստանի Դաշնությանը ՀՀ-ի և ՌԴ-ի միջև գոյություն ունեցող 1997 թվականի պայմանագրի շրջանակներում Հայաստանի տարածքային ամբողջականությունը պաշտպանելու կոչով և համաձայնագրի շրջանակներում փոխադարձ պարտականություններն իրագործելու տրամաբանության շրջանակներում», - ասաց Արմեն Գրիգորյանը։

ԱԽ քարտուղարի խոսքով՝ սա բանավոր դիմում է, որը գրավոր ընթացակարգ է ունենալու. «Մենք ակնկալում ենք, որ Ռուսաստանի Դաշնությունն օգնություն կտրամադրի և մենք հնարավորություն կունենանք Հայաստանի տարածքային ամբողջականությունը վերականգնելու», - ասաց ԱԽ քարտուղարը:

«Բազմաթիվ անգամ խոսվել է, որ ՀՀ պետական սահմանը հանդիսանում է կարմիր գիծ ՌԴ-ի համար եւ մայիսի 12-ից սկսած ադրբեջանցիները խախտել են այդ մարմիր գիծը: Այս առումովմենք մեր դաշնակիցին դիմում ենք, որ կարողանանք մեր դաշնակցային պարտավորությունների շրջանակներում վերականգնել ՀՀ տարածքային ամբողջականությունը»,-ասել է նա:

Հարցին, թե այդ օգնությունը ենթադրում է բանակցություններում ներգրավվածությո՞ւն, թե՞ զինված ուժերով օգնություն, ԱԽ քարտուղարը պատասխանել է. «Եթե հնարավոր լինի այս իրավիճակը հանգուցալուծել բանակցային ճանապարհով, ապա լուծել բանակցային ճանապարհով, իսկ եթե հնարավոր չլինի, ապա տրամադրել Հայաստանին բավական ռազմական օգնություն, որպեսզի Հայաստանը կարողանա ստեղծված իրավիճակը հանգուցալուծել»:

Ինչ վերաբերում է ՀԱՊԿ-ին, Արմեն Գրիգորյանն ասել է. «Այս ուղղությամբ եւս մենք նախապատրաստական աշխատանքներ ենք կատարում: Իհարկե, մենք մայիսի 12-ին ստեղծված իրավիճակով դիօմել էինք ՀԱՊԿ-ին, որ ճգնաժամը լուծենք: Բավարար ջանքեր չի գործադրվել խնդիրը լուծելու, բայց մենք շրունակելու ենք աշխատել: Քանի որ ՀԱՊԿ-ի նախագահությունն այսօր գտնվում է Հայաստանի ներքո, այսինքն Հայաստանը ՀԱՊԿ նախագահն է, ապա մենք հավելյալ քայլեր կձեռնարկենք, որպեսզի ակտիվացնենք նաեւ ՀԱՊԿ-ի շրջանակներում մեր քայլերը: ՀԱՊԿ պայմանագրի շրջանակներում նախատեսված է այն գործիքակազմը, որը հնարավորություն է տալիս որեւէ անդամ երկրի տարածքային ամբողջականության որեւէ ոտնձգության դեպքում քայլեր ձեռնարկել»: