Ղազախստանում պատրաստվում են արգելել ընտանի կենդանիներ ուտելը

Ղազախստանում պատրաստվում են արգելել ընտանի կենդանիներ ուտելը. այդ նորմն ընդգրկված է կենդանիների հետ պատասխանատու վերաբերմունքի մասին օրինագծի մեջ: Այդ մասին հաղորդում է ՏԱՍՍ-ը՝ հղում անելով հանրապետության բնապահպանության, երկրաբանության եւ բնական ռեսուրսների փոխնախարար Ալիա Շալաբեկովային:

Օրինագիծը նաեւ կարգելի շների մարտերը, առանց ցավազրկման անասնաբուժական վիրահատությունները, կենդանիների անօրինական սպանությունները, նրանց հյուծելը եւ ժամանակին օգնություն չցուցաբերելը, ոչ հումանիստական որսը:

Նշվում է, որ ընտանի կենդանիներ ուտելու արգելքը ներառված է օրինագծում երկրում տեղ գտած նախատեպերի ֆոնին:

«Եղել է դեպք, երբ մարդը շների կացարանից վերցրել է կենդանիներ ու իրականում օգտագործել սննդի մեջ այդ շներին՝ որպես միս: Կնախատեսվի, որ եթե քաղաքացին կենդանի է վերցրել պահելու համար, ապա պարբերաբար կացարանը կարող է հետեւել՝ ինչպես է շունն այդ տիրոջ մոտ»,-բացատրել է փոխնախարարը:

Սննդի մեջ կենդանուն օգտագործելու դեպքում մարդը կենթարկվի քրեական պատասխանատվության «կենդանիների հետ դաժան վերաբերմունք, որը հանգեցրել էր կենդանու մահվան» հոդվածի հատկանիշներով:

Բացի այդ, օրինագիծը նախատեսում է ընտանի կենդանիների պարտադիր հաշվառում: Տերերը պարտավոր են չիպեր տեղադրել կենդանիների վրա, որոնց տվյալները կներառվեն տեղական մարմինների ընդհանուր բազայում: Ընթացակարգից հրաժարվելու դեպքում նախատեսվում է վարչական պատասխանատվություն: