««Իմ պետությունը», «իմ ժողովուրդը», «իմ խումբը» հնացած, նեղ մտածելակերպ է»․ Դալայ Լաման խոսել է Covid-19-ը հաղթահարելու հարցում ընդհանուր պատասխանատվության մասին

Դալայ Լամա XIV-ը հնդիկ բժիշկների և դեղագործների հետ առցանց հանդիպման ժամանակ խոսել է կորոնավիրուսային վարակի մասին և նշել, որ բոլոր պետությունները պետք է գիտակցեն երկրագնդի վրա ապրող 7 միլիարդ մարդու փոխկապակցված լինելն ու համավարակի հաղթահարման ընդհանուր պատասխանատվությունը, հայտնում է «ՌԻԱ նովոստի» լրատվական գործակալությունը։

«Այսօր մենք կանգնած ենք կորոնավիրուսային համավարակի՝ ընդհանուր համաշխարհային խնդրի առջև, և բոլոր մարդիկ պատասխանատու են այս խնդիրը հաղթահարել սովորելու հարցում։ Սա կապված է 7 միլիարդ բնակչության ընհանուր ընկալման հետ՝ հասկանալով, որ մենք պետք է սովորենք միասին ապրել այս մոլորակի վրա։ «Իմ պետությունը», «իմ ժողովուրդը», «իմ խումբը» հնացած, նեղ մտածելակերպ է: Մենք պետք է մտածենք ամբողջ մարդկության մասին»», - ասել է Դալայ Լաման` ընդգծելով, որ երկրագնդի 7 միլիարդ բնակչությունը միավորված է։ Նա նշել է, որ այսօր գիտնականները մարդուն անվանում են «սոցիալական կենդանի», ինչը նշանակում է, որ նա պատասխանատու է խմբի մյուս անդամների հաջող և երջանիկ կյանքի համար։

Ինչպես ավելի վաղ տեղեկացրել էինք, Դալայ Լաման նշել էր, որ երկարակեցության համար առողջ մարմին, ինչի հիմնական երաշխիքը առողջ քունն է։ Նա ասել էր, որ ինքն ամեն գիշեր խորը և հանգիստ քնում է 9 ժամ։, որից բացի զբաղվում է նաև մեդիտացիայով։

«Հոգեկան և ֆիզիկական առողջության համար այդքան անհրաժեշտ «հոգեկան հանգստությունը» ձեռք է բերվում առաջին հերթին կարունան (կարեկցանք) զարգացնելու և ոչ պակաս կարևոր ահիմսա (բռնության բացակայություն) սկզբունքի պահպանման միջոցով», - ասել էր Դալայ Լաման։

14-րդ Դալայ Լաման, որի իսկական անունը Լհամո Դհոնդրուբ է, ծնվել է 1935 թվականի հուլիսի 6-ին Տիբեթի հյուսիս-արևելքում գտնվող Տակցեր գյուղում: Նա 1937-ին ճանաչվել է իր նախորդի վերամարմնավորումն ու 1940-ին՝ ստանձնել պաշտոնը։ 1959 թվականին Տիբեթի՝ Չինաստանի կազմում ներառվելուց հետո, Դալայ Լաման փախել է Հնդկաստան և այժմ նրա նստավայրը Հիմալայան Դհարամշալա քաղաքում է։

Նա համարվում է բոլոր բուդդաների կարեկցանքի մարմնացումը։ 14-րդ Դալայ Լաման 1989 թվականին արժանացել է Խաղաղության Նոբելյան մրցանակի` տարբեր երկրներում կրթական գործունեության և խաղաղարար ջանքերի համար: Նա իր ողջ կյանքի ընթացքում հատուկ ուշադրություն է դարձրել կրթության զարգացմանն ու ժամանակակից գիտության հետ բուդդիզմի փոխազդեցությանը։