Հետպատերազմյան վեց ամսում դիրքերի կահավորման ուղղությամբ չի արվել որևէ բան, որը կկանխեր այս սադրանքը, իսկ թշնամին կամովին հետ չի քաշվելու. Հրաչյա Պետրոսյանց (տեսանյութ)

Ռազմական տեսանկյունից որևէ հույս չկա, որ թշնամին կամովին հետ կքաշվի զբաղեցրած դիրքերից, նրան պետք է հարկադրել որոշակի միջոցներով՝ քաղաքական և դիվանագիտական, բայց ամենակարևորը ռազմական ուժի կիրառումն է. ողջամիտ ժամկետ տալու մասին ՊՆ երեկվա հայտարարությունն ուշացած էր, առաջին իսկ օրը ՀՀ-ում պետք է հայտարարվեր ռազմական դրություն, տեղի ունենար մոբիլիզացիա, ձևավորվեին նոր զորամասեր: «Արմնյուզ» ՀԸ «#ՕրաԽնդիր» հաղորդման ժամանակ երեկ նման կարծիք է հայտնել ռազմական փորձագետ, պահեստազորի փոխգնդապետ Հրաչյա Պետրոսյանցը:

«Հակաքայլերով պետք է ցույց տալ, որ պատրաստ ենք ուժով պաշտպանելու մեր երկրի սուվերենությունը: Մղվում է տեղեկատվական պատերազմ, որից օգտվում է հակառակորդը: Այն ուղղակիորեն ազդում է ամբողջ ազգաբնակչության վրա: Իշխանությունը պետք է կարողանա այնպիսի վստահություն ստեղծել, որ իր տված տեղեկատվությանը հավատան, բայց ակնհայտ է, որ այդ տեղեկատվությունը ոչ լիարժեք է»,- ասել է ռազմական փորձագետը:

Ըստ Պետրոսյանցի՝ պետական սահմանի պաշտպանության խնդիր իրականացնելիս պետք է կանխատեսել թշնամու գործողությունները և կանխել դրանք. «Կոնկրետ ուղղություններով մարտական հերթապահություն չի իրականացվել, մեր կողմից չկահավորված հատվածներում հակառակորդն անարգել առաջ է եկել: Եթե մայիսի 12-ի դրությամբ ունենայինք կահավորված սահման, այնտեղ լիներ մեր զինվորը, նա կրակ էլ կբացեր, մարտի մեջ էլ կմտներ: Մենք պարտավոր էինք ունենալ նման դիրքեր, քանի որ ստեղծված վիճակը պարտադրում է ամենաարագ միջոցները ձեռնարկել սահմանը կահավորելու համար»:

Փորձագետի կարծիքով՝ թշնամական պետությունն ամենաբարձր մակարդակով հայտարարում է, որ ուժով բացելու է Զանգեզուրի միջանցքը, իսկ մենք հանցավոր անգործություն ենք ցուցաբերում. «Ցավոք, այսօր մեր հասարակությունը պատրաստ չէ պատերազմի: Իսկ որպեսզի հակառակորդին թույլ չտանք իրականացնել իր ծրագիրը, մենք պետք է պատերազմի մեջ մտնենք: Ունեինք վեց ամիս, այդ ընթացքում ոչինչ չի արվել, մենք պետք է կանխարգելեինք սա, պետք է հասկանալ՝ ինչո՞ւ չի արվել, սա կարող է լինել հանցավոր անփութություն, միտումնավորություն, կամ փափուկ բարձ՝ դրված պատասխանատուների գլխի տակ»:

Փոխգնդապետի պնդմամբ՝ ցանկացած պետություն ձգտում է հնարավոր պատերազմն իրենից հեռացնել, այդ պատճառով էլ հակառակորդը քայլ առ քայլ առաջ է գալիս ՀՀ տարածքում: «ՀՀ-ում չկա գեթ մեկ միլիմետր, որը մեզ համար ռազմավարական կարևորություն չունենա, մենք չունենք անկարևոր բարձունքներ կամ տարածքներ: Մենք օպերատիվ խորություն կամ թիկունք չունենք, ՀՀ ամբողջ տարածքն ընդամենը մարտավարական խորություն է, և մենք անգամ մեկ մետր զիջելու իրավունք չունենք: Նաև այդ պատճառով այսօր ՀՀ դեմոգրաֆիական վիճակը խնդրահարույց է: Սահմանին ունենք անվտանգության գոտու կարիք, մեր հոգեբանական խնդիրը հաղթահարելու համար պետք է անվտանգ տարածք ստեղծենք, դրա համար պետք է ունենալ Հայաստանի անվտանգությունն ապահովող և մի քանի կմ լայնությամբ ապառազմականացված գոտի»,- ամփոփել է Հրաչյա Պետրոսյանցը: