Ձեր հերոսները իրական հերոսներ են. Քերոլայն Քոքսը ներկա էր Գուրգեն Մարգարյանի կիսանդրու բացմանը
Ես շոկի մեջ ընկա, երբ լսեցի, որ Գուրգեն Մարգարյանը՝ քնած հայ սպան սպանվել է ադրբեջանցու կողմից: Այնուհետև ես զարմացա, երբ լսեցի, որ Ռամիլ Սաֆարովն իր երկրում արժանացել է հերոսի կոչման: Դա ինձ շատ է անհանգստացնում Ադրբեջանի ապագայի համար, իրենց երեխաների դաստիարակման համար, երբ մարդասպաններին վերաբերում են որպես հերոսի:
2004թ. փետրվարի 19-ին Հունգարիայում սպանված հայ սպա Գուրգեն Մարգարյանի կիսանդրու բացման ժամանակ ասաց Մեծ Բրիտանիայի և Հյուսիսային Իռլանդիայի Միացյալ Թագավորության խորհրդարանի Բրիտանահայկական համակուսակցական խորհրդարանական խմբի նախագահ, բարոնուհի Քերոլայն Քոքսը:
Բարոնուհին պատմեց, որ ուսումնարաններից մեկում սովորել են երկու երիտասարդ ադրբեջանցիներ, ովքեր կողմ են եղել Սաֆարովին հերոսի կոչմանն արժանացնելուն:
Բարոնուհին ընդգծեց, որ ինքը հարգում է հայ ժողովրդին և փառք ու պատիվ մաղթեց Հայաստանի և Արցախի հայերին:
Քերոլայն Քոքսը հիշեց, որ Արցախում՝պատերազմի տարիներին, ինքը պատիվ է ունեցել կանգնել այն քաջ մարտիկների կողքին, ովքեր պայքարել են իրենց հայրենիքի պաշտպանության համար:
Բարոնուհին ասաց, որ Գուրգեն Մարգարյանի կիսանդրին ամեն օր հայ ժողովրդին կհիշեցնի նրա սխրագործությունների մասին և ավելացրեց.«Ձեր հերոսները՝ իրական հերոսներ են»:
Իր ելույթի ավարտին Քերոլայն Քոսքը շնորհակալություն հայտնեց ողջ հայ ազգին՝ ժողովրդավարության համար և ողջունեց այն զարգացումը որը տեղի է ունենում Արցախում և Հայաստանում. «Հայն այն ժողովուրդն է, որ կարող է մոխիրներից հառնել»:
Ի դեպ, Քերոլայն Քոքսը Հայաստան է ժամանել 80-րդ անգամ: Նա առաջին անգամ Հայաստանում եղել է 1991թ.-ի մայիսի 20-ին: