Սոցիալական աջակցության մասին օրենքում նախատեսված աջակցությունը կտարածվի նաև այն համայնքների բնակիչների վրա, որոնք պատերազմի հետևանքով դարձել են սահմանամերձ. Մեսրոպ Առաքելյան
Թշնամու տիրապետության տակ հայտնված տարածքներում բնակվող ընտանիքներին՝ յուրաքանչյուր անձին տրամադրվում է 30 հազար դրամ, գործում են նաև աջակցության այլ ծրագրեր, տրամադրվում է նաև պարեն. այսօր լրագրողների հետ հանդիպման ժամանակ նշեց աշխատանքի և սոցիալական հարցերի նախարար Մեսրոպ Առաքելյանը՝ անդրադառնալով լրագրողի հարցին, թե Հայաստանում վարձով բնակարաններն սկսվում են 70 հազար դրամից, արդյո՞ք նախարարության կողմից տրամադրված 30 հազար դրամը բավարար է նրանց սոցիալական կարիքները բավարարելու համար:
Անդրադառնալով՝ վիրավոր զինծառայողների առողջապահական խնդիրներին, նախարարը նշեց, որ աջակցման ծրագիրն իրականացվում է «Զինծառայողների ապահովագրության հիմնադրամի» միջոցով:
Լրագրողի հարցին, թե կա զինծառայող, որը 5 վիրահատության է ենթարկվել և 6-ն էլ նախատեսված է տոներից հետո, ունի վերջույթների և բեկորային վնասվածք, որի պատճառով անկողնային է դարձել, արդյո՞ք ծրագրի շահառու է, թե ոչ, Առաքելյանը պատասխանեց.
«Ծրագրի շահառու հանդիսանալու համար առկա է հիվանդությունների շարք, կոնկրետ դեպքով պետք է հասկանալ՝ հանդիսանո՞ւմ է, թե ոչ, դուք դեպք եք ասում, որը պետք է բժշկական հիվանդությունների ցանկում լինի, եթե հանդիսանում է, ապա կստանա, եթե ոչ՝ պետք է անցնի բժշկական սոցիալական հետազոտություն»:
Հարցին, թե Շուռնուխում և Որոտանում խնդիրներ են առաջանալու, ունե՞ք մոտավոր հաշվարկ թե քանի բնակչի կարող եք սոցիալական աջակցություն տրամադրել, Մեսրոպ Առաքելյանը նշեց, որ այս պահին կա սահմանամերձ համայնքների աջակցության մասին օրենք, որտեղ ներառված են մինչ սեպտեմբերի պատերազմի ընթացքում եղած սահմանամերձ տարածքները՝ Տավուշ, Գեղարքունիքի և Արարատի մարզերը, հիմա քննարկվում է, ճշգրտվում է վերջանական համայնքների ցանկը։
«Այն համայնքները, որոնք պատերազմի հետևանքով դարձել են սահմանամերձ, կհայտնվեն այդ ցանկում և սոցիալական աջակցության մասին օրենքում նախատեսված աջակցությունը նաև կտարածվի այդ համայնքների բնակիչների վրա»,- հավաստիացրեց նա: