Ինչպես դառնալ քաղաքական գործիչ

Ոչ մի բուհում, ոչ մի հաստատությունում, ոչ էլ որևէ շրջապատում չեն գործում հատուկ դասընթացներ քաղաքական գործիչ դառնալու համար:Կրթությունն ու մասնագիտությունն էլ վճռորոշ նշանակություն չունեն դրա համար:Մեր քաղաքական գործիչների մեջ կան բժիշկներ, մանկավարժներ, ՊԱԶ-ի շոֆերներ, յոթնամյակը կամ ութնամյակը կիսատ թողածներ: Նրանցից ամեն մեկը յուրովի է անցել այդ ճանապարհը: Այնուհանդերձ քաղաքական գործիչ դառնալու ձգտում ունեցողների համար մեզ մոտ բացվում է իր տեսակի մեջ եզակի, մասնավոր նոր բուհ: Մինչ այդ դիմորդներին խորհուրդ է տրվում առաջնորդվել հետևյալ կանոններով:
ԿԱՆՈՆ 1-ԻՆ
Ինչքան հնարավոր է հեռու մնացեք լրագրողներից, դրանք նման են, հեռու իրենցից, վարժեցված շների, հոտառությամբ գտնում և կծում են բաց մնացած, ցավոտ տեղերդ: Տեսնում եք պատասխան չունեք դրանց տված հարցերին, դեմքի կիսախոժոռ և կիսաժպիտ արտահայտությամբ ասացեք'
-Ձեր հարցը կոռեկտ չէ:
Այդ խոսքից հետո լրագրողների գլխուղեղի ֆայլերը կկախվեն, մինչև ռեստարդ անի, կարգավորի, դուք արդեն անհասանելի կլինեք: Լավ հիշեք, ուրեմն ,,կոռեկտ չէ,, արտահայտությունը ամենափրկիչն է բարդ հարցերից և իրավիճակներից դուրս գալու համար:
ԿԱՆՈՆ 2-ՐԴ
Եթե նախկինում ամեն խոսքի գլուխ բոլորը օգտագործում էին '
-Պիտի ամեն ինչ անենք եվրաինտեգրման համար:
Հիմա դա կտրականապես անօգտագործելի է: Նախ'դա ցույց կտա, որ դուք քաղաքականապես դեռ չեք հասունացել, հնարավոր է դրանով խաչ քաշեք քաղաքական կարիերաներիդ վրա: Երկրորդը'խորհուրդ չի տրվում ,,եվրաինտեգրման,, փոխարեն ,,ռուսաինտեգրում,, օգտագործել ոչ միայն այն պատճառով, որ դա ականջի համար բարեհունչ չէ, այլև այդ հասկացությունը բոլորը չէ, որ հասկանում են և Հայաստանում և Ռուսաստանում:
Եվ այսպես հանրապետությունում բացվում է նոր բուհ: Նպատակը' պատրաստել երկրի կառավարման համար անհրաժեշտ կադրեր' երկրի ապագա նախագահներ, վարչապետներ, Ազգային ժողովի նախագահներ, դատախազներ, ոստիկանապետեր, ուժային և անուժ նախարարներ: Ֆինսա-տնտեսական ճգնաժամի պարտադրանքով ուսման տևողությունը չի կարող գերազանցել մեկ տարին: Հապաղումն'երկրորդ սերունդի բարեփոխումների և իշխանափոխության պատրաստվող երկրին կարող է ծանր վիճակի առջև կանգնեցնել:
ԸՆԴՈՒՆԵԼՈՒԹՅԱՆ ՊԱՅՄԱՆՆԵՐԸ
Մասնավոր այս բուհում ընդունվում են այն դիմորդները, որոնց տարիքն երեսունը չի անցնում, ովքեր ինքնուրույն, առանց որևէ մեկի օժանդակության կարողանում են կապել իրենց փողկապները /վզկապները/, ունեն սեփական ֆիրմային ավտոմեքենա, նոուտբուկ / լեպթոփ/ և տիրապետում են Վոռդ, Էքզել ծրագրերին, ապրում են մայրաքաղաքի էլիտար թաղամասերից մեկում, ծնողները կամ հոպարներն ազատ ելումուտ ունեն պետական այն կառույցներում, որտեղ դիմորդը հետագայում աշխատելու հավակնություններ ունի:
Անգլերեն լեզվի իմացությունը' Թեյֆելի բալային համակարգի ամենացածր նիշի սահմաններում լիովին բավարարում է:
Հայոց լեզվի իմացությունը'այնքանով, որքանով: Որոշ բառեր հայերեն չիմանալու դեպքում, ազատորեն կարող են օգտագործել ռուսերեն, անգլերեն, անգամ ժարգոներեն: Օրինակ' համակարգիչին կարող են անվանել կոմպ, դավեր լարել' բոչկա գլորել, խառնակչություն սերմանել' մուտիլովկա անել և այլն: Սրանք հանրորեն ընդունված բառեր են, որոնց հայերեն տարբերակները գործածությունից վաղուց դուրս են մղվել:
Ցանկալի է դիմորդները ակնոցներ կրեն, ունենան թեթևակի բեղ-մորուս , սափրագլուխներն ավելի նախընտրելի են/սովորաբար դրանք ավելի պնդերես ու ամեն տեսակ թոհուբոհի դիմակայող են /:
Ընդունվողները խորանում են հետևյալ առարկաների և պրինցիպների մեջ'
Օտխոդ, պոդխոդ կ նաչալստվու,
Կոնֆլիկտային իրավիճակների հաղթահարում/ ռազբորկա, սխոտկա/
Մարտարվեստի ժամանակակից ձևեր /բազկամարտ, բռնցքամարտ/,
Վազք աստիճանավանդակներից վերև-ներքև,
Երաժշտական ընդունակությունների ստուգում/ դուդուկի տակ պար, opa gangnam style/
Ավարտողները ազատորեն օգտագործում են /հասկանալը պարտադիր չէ/ հետյալ բառային ֆոնդը
Գլոբալիզացիա
Դիվերսիֆիկացիա
Դիսպոզիցիա
Ինովացիա
Ռեցեզիա
Սելվեստր
Պոպուլիզմ
Կոնտենտ
Տրանշ, լոտ և ուրիշ բառեր, որոնց հայերեն օգտագործումն իրենց իմիջին մեծագույն վնասներ կարող են հասցնել:
Արտադրական պրակտիկան անցկացնում են ընտրությունների քարոզարշավներում' մտնելով տնից տուն, բակից բակ, թաղից թաղ, քաղաքից քաղաք' անձնագրավորելով կամ գույքագրելով ընտրողներին հուզող բոլոր խնդիրներն ու պահանջները: Այդ ընթացքում, որտեղ էլ որ մտնում են, իրենց ունկնդիրներին ու ակնդիրներին պիտի համոզեն, որ իրենցից առաջ և իրենցից հետո եկողները սուտ խոստումներ տվողներ են, իսկ ժողովրդի հոգսերն ու ցավերը, մատից փուշ հանողները միայն իրենք են, որ կան:
Արտադրական պրակտիկան անցնում է երկու շրջափուլով: Առաջին շրջափուլում պիտի ապացուցվի, որ գործող իշխանություններն անթերի ու անարատ են, ոնց որ մայիսոցվա արդար , հալած յուղ, և եթե նրանք չեն կարողացել որոշ հարցեր լուծել, ապա մեղավորն ոչ թե իրենք են եղել, այլ օբյեկտիվ պատճառները
Երկրորդ շրջափուլում պիտի խորացնեն իրենց գիտելիքներն և համոզմունքներն այն բանում, որ գործող իշխանություններն ապիկարներ են կամ խաժամուժներ, որոնց քոքը կտրելուց հետո միայն երկրում կարգուկանոն կմտնի:
Այս շրջափուլերը անցնելուց հետո պատրաստում են դիպլոմային աշխատանք, որտեղ կարմիր թելի նման պիտի անցնի այն գաղափարը, որ այս քաղաքի /այս երկիրի/ իշխանությունը իրենք ոչ մեկին ոչ մի դեպքում չեն զիջելու:
Սովորողները Ազգային Ժողովում արտադրական պրակտիկա անցնելիս կարող են օգտվել պատգամավորների համար նախատեսված սնունդի բլոկի էժանագին և բարձրորակ ճաշերից: Արձակուրդներին կմասնակցեն Բազեների համար կազմակերպվող հավաքներին:
Սովորողների ուսման վարձը գանձվում է աշխատանքի անցնելուց հետո' բոնուսային համակարգով. որքան բարձր է ավարտելուց հետո ստացած պաշտոնը, այնքան մեծ են սպասվելիքները:
Սոցիալապես անապահով խավի և ազատամարտիկների ընտանիքի անդամները կարող են ընդունվել , եթե ներկայացնեն համապատասխան երաշխավորագրեր , գործուղման թերթիկներ վարչակառավարչական ապարատի բաժիններից կամ ունենան առնվազն տաս տարուց ոչ պակաս աշխատանքի փորձ կառավարման բարձրագույն օղակներում:
Բուհի հասցեն առայժմ որոշված չէ, մեզ կարող եք հանդիպել կառավարական շենքերի միջանցքներում, շքամուտքերից ներսուդուրս անելիս:
Շուտով ավելի մանրամասն տեղեկություններ կարող եք ստանալ մեր գովազդային արշավի ընթացքում:
Հավատացեք և վստահեք մեզ: Մեր նշանաբանն է',,Մենք կոչված ենք ծառայելու երկրի ապագան հուսալի ձեռքերում պահելու ազգանվեր գործին,,:
Մն. Հարությունյան
լրագրող

Մնացական Հարությունյան. ֆեյսբուք