Երջանիկ ընտանիք կազմելու նախապայմանները

Երջանկությունը շատ չի լինում: Անգամ եթե կյանքում ամեն ինչ լավ է, մենք ինչ-որ ճեղքեր ենք փնտրում սիրելիի հետ հարաբերություններում, ինքներս մեզ տանջում ենք չհիմնավորված ենթադրություններով: Արդյունքում՝ փոխադարձ չհասկացվածություն ու անվստահություն. ամբողջովին չարտահայտված մտքերը վերաճում են թաքնված վիրավորանքների: Վախենալով բարձրաձայնել այն, ինչ ներքուստ հանգիստ չի տալիս, նախապես հասկանալով շատ մտքերի անհեթեթությունը՝ սկսում ենք հնարավոր պատասխաններ փնտրել:
Պատասխաններ գտնելու ամենահեշտ միջոցը շատերի համար սեփական կյանքը հարազատների, ընկերների, ծանոթ կամ անծանոթ մարդկանց կյանքի հետ համեմատելն է: Հենց այստեղ էլ սկսվում են խնդիները: Համեմատելիս մենք երբեք չենք մտածում այն մասին, որ այլոց հարաբերությունները մեզ վրա “փորձելը” գրեթե նույնն է, ինչ հագնել մի իր ուրիշի պահարանից:

Մեդալի երկու կողմերը

n3.jpgԿնոջ և տղամարդու միջև փոխհարաբերությունների վերաբերյալ գլոբալ գնահատական տալիս, կարելի է առանձնացնել երկու շատ կարևոր ասպեկտ՝ հարաբերություններ տանը, որտեղ չկան կողմնակի աչքեր և հարաբերություններն ընտանիքից դուրս (սա կիրառելի է նաև նրանց հանդեպ, ովքեր դեռ ամուսնացած չեն, այլ միայն հանդիպում են): Դուք ինքներդ ձեզ համար պետք է որոշեք, թե այս երկու կողմերից ո՞րն է ձեզ համար առավել նշանակալից ու կարևոր:
Նրանց համար, ովքեր առաջին հերթին հետաքրքրվում են արտաքին աշխարհի գնահատականով ու կարծիքով, ամենայն հավանականությամբ ընդունելի են հաշվարկով հարաբերությունները: Կարևոր չէ նյութական, թե՝ մեկ այլ: Եթե իրենց ընտրյալը շրջապատում դրական արձագանք չգտավ, ապա նրանք անընդհատ իրենց դժբախտ և սխալ ընտրություն կատարած կզգան: Նման մարդու սիրտը միայն կարելի է շահել՝ դառնալով նրա բոլոր ծանոթների իդեալը, ինչը բավական բարդ է և ոչ տրված ամենքին:
Երկրորդ կատեգորիան ամենից առաջ մտածում է այն մասին, թե ինչպիսին կլինեն հարաբերությունները տանը, որտեղ ոչ ոք չի տեսնում և չի լսում նրանց: Հենց այսպիսի զույգերը հեշտությամբ կարող են ասել, որ իրոք երջանիկ են: Նրանց միջև իշխում է իդիլիան ու ներդաշնակությունը, որովհետև նրանք միմյանց ընտրում են՝ ելնելով սեփական պահանջմունքներից, այլ ոչ թե հարմարվելով շրջապատին: Որպես հետևանք, նման զույգը տանից դուրս էլ երջանիկ ու միմյանցով բավարարված կլինի, որովհետև նրանց հարաբերություններն առաջին հերթին կառուցվում են սեփական երջանկության, այլ ոչ թե մարդկանց ի ցույց դնելու համար:

Ուրեմն ինչպե՞ս փնտրել կյանքի զուգընկեր

c4.jpgԱրդյո՞ք Դուք Ձեզ երբևէ տվել եք այս հարցը: Երևի մեզնից յուրաքանչյուրն էլ իր կյանքում գոնե մեկ անգամ ինքն իրեն հարցրել է այս մասին. մեկն ավելի շուտ, մյուսն ավելի ուշ: Ավելի լավ է դա անել մինչ սխալվելը, “խանձվելն” ու հիասթափության դառնությունը զգալը: Երկու կատեգորիաներին էլ պետք է սահմանել այն հատկանիշները, որոնք առավել կարևոր են զուգընկերոջ մեջ: Պետք չէ գործնականում ստուգել մեկին, երկրորդին, երրորդին… տասներորդին: Պետք չէ հույս ունենալ, որ “կհանդուրժվի-կսիրվի”, “կապրենք՝ կտեսնենք”: Եթե մենք չգիտենք, թե ինչ ենք ցանկանում տեսնել, ապա չենք էլ տեսնի: Որքան հաճախ են ասում՝ “Նրա մեջ ինչ-որ բան այն չէ…”, սակայն չեն կարող ասել, թե կոնկրետ ինչը: Սակայն, չնայած իրավիճակի պատասխանատու և բարդ լինելուն, այն շատ հեշտությամբ լուծվում է:
Վերցրեք թուղթ ու գրիչ։ Գրեք՝ “Իմ սիրելին պետք է լինի …”: Այնուհետև թվարկեք այն բոլոր հատկանիշները, որոնք կցանկանայիք տեսնել Ձեր երկրորդ կեսի մոտ: Լսե՞լ էիք այդ մասին: Եթե չեք հավատում կամ չեք արել, ապա ճիշտ ժամանակն է ստուգել: Ամենայն լրջությամբ մոտեցեք նրան, ինչ կգրեք: Մի՛ գրանցեք այնպիսի բնորոշումներ, ինչպիսիք են՝ “Ես ցանկանում եմ արքայազն սպիտակ ձիով” կամ “Երազում եմ իդեալական կնոջ մասին”: Յուրաքանչյուրի մոտ արքայազներն ու իդեալները տարբեր են: Գտե՛ք Ձերը: Դրա համար հնարավորինս մանրամասն և իրական նկարագրեք Ձեր ցանկությունները:
Սկզբի համար նկարագրեք, թե ինչպիսին պետք է լինի Ձեր կյանքի ընկերը տանը՝ ամեն օր, աշխատավայրում, կոլեկտիվում, ընկերների հետ, ինչպես է նա սիրում անցկացնել իր ազատ ժամանակը, ինչով է հետաքրքրված, ինչպես է վերաբերվում Ձեզ, երեխաներին, հարևաններին, իր և Ձեր ծնողներին, ինչպես է վարվում բարդ իրավիճակներում, ինչպես է լուծում խնդիրները, արձագանքում կատակներին, նախատինքներին, նկատողություններին… Որքան շատ մտածեք այն մասին, թե որտեղ և ինչպես է նա իրեն դրսևորում, ինչպիսի տեսք ունի Ձեր ընտրյալն, այնքան ավելի արագ կհանդիպեք նրան, ում մասին երազում եք:
Դժվար թե նման նկարագրությունն առաջին անգամից ստացվի ամենքի մոտ, հնարավոր է՝ մտորումների ու լրացումների ժամանակ պահանջվի: Մի քանի օրից վերստին կարդացեք ցանկը և եթե պետք է՝ ուղղումներ, ճշգրտումներ մտցրեք: Ամենայն հավանականությամբ, Դուք այդպես էլ չեք հանդիպի մեկին, ով 100%-ով կհամապատասխանի Ձեր բոլոր գրածներին: Այդ պատճառով անհրաժեշտ է առանձնացնել 5 հիմնական հատկանիշ, որոնք Ձեզ համար ամենակարևորն են: Եվ ևս 5-ը, որոնց հետ չեք կարողանա համակերպվել ոչ մի դեպքում:
Ի դեպ, մի՛ մոռացեք, որ իդեալական մարդ չի լինում, և պարտադիր չէ, որ Ձեր ցանկը ներառի միայն դրական կողմեր:
Յուրաքանչյուր ակամա ծանոթից հետո Դուք արդեն կգնահատեք նրան տրված չափանիշներով: Եվ երբ հանդիպեք այն միակին, Ձեզ արդեն չեն պատի կասկածները, իսկ զգացմունքները Ձեզ խաբուսիկ չեն թվա: Դուք մարդուն չեք համապատասխանեցնի պահի տակ հորինված կերպարին, ինքն արդեն կլինի նա, ում փնտրում էիք:

Եթե ես առաջ իմանայի…

r5.jpgՀարաբերությունների պահպանման մեջ ամենակարևորն իրար ընդունելն է այնպիսին, ինչպիսին կաք: Առանց “կճեպի”, երբ պետք չէ ձևացնել, փորձել սիրաշահել, համապատասխանել: Երբ մարդը կարող է լինել այն, ինչ կա և չվախենալ, որ դրա համար իրեն կդատապարտեն կամ կփորձեն վերափոխել, վերադաստիարակել: Սեփական “ԵՍ”-ի ամբողջականությունը կարևոր է թե՛ տղամարդու, թե՛ կնոջ համար՝ միայն այն տարբերությամբ, որ կինն ուզում է իրեն մշտապես սիրված, ցանկալի ու պետքական զգալ, իսկ տղամարդը՝ գնահատված, հարգված ու հասկացված:
Կնոջ ցանկացած հիստերիա կարելի է հեշտությամբ դադարեցնել սիրո խաստովանությամբ կամ անկեղծ հաճոյախոսությամբ: Ինչպես նաև տղամարդու ցանկացած պրետենզիա կարելի է հանդարտեցնել, եթե ցույց տալ, որ իր կարծիքը շատ կարևոր է Ձեզ համար և Դուք լսում եք նրան: Պարզապես ցույց տվեք Ձեր ամուսնուն, որ տան տերն ինքն է:
Միմյանց ընդունելով ինչպես կանք՝ մենք պահպանում ենք յուրաքանչյուրիս ընտրության իրավունքը, որոշումների կայացման մեջ ինքնուրույնությունը: Երջանկությունը կերտվում է նախ և առաջ մանրուքներից: Հարաբերություններում ներդաշնակություն է ստեղծվում այն ժամանակ, երբ յուրաքանչյուրն անում է այն, ինչ ցանկանում է և երբ ու որտեղ ցանկանում է՝ իմանալով, որ իրեն չեն դատապարտի, սկանդալ չեն ստեղծի: Մեր ընթերցողներից շատերը գուցե կասեն՝ “Դե իհարկե, եթե նրան չստիպել, ոչնչի էլ չես հասնի…”: Նման դեպքերի համար խորհուրդ ենք տալիս ուսումնասիրել մարդկանց մանիպուլյացիայի միջոցները, սակայն տվյալ հոդվածին դա չի վերաբերում: Չնայած ճնշման բացակայությունը՝ դա շատերի համար գործելու լավ խթան է հանդիսանում:

Աշխարհը, որում ես ապրում եմ, կոչվում է երազանք…

vc6.jpgԿիսե՛ք Ձեր իդեալական աշխարհը զուգընկերոջ հետ, առատաձեռն եղեք սիրո, ուրախության ու աջակցության հարցում: Թող տուն վերադառնալը միշտ հաճելի լինի: Մի՛ պահանջեք, այլ տվեք: Փոխադարձությունը պետք է լինի ամեն ինչում: “Դու՝ ինձ, ես՝ քեզ” արտահայտությունը պետք է ընկալվի ոչ թե որպես “Դու կանես, ես էլ կանեմ” պայման, այլ որպես ընծա՝ ես ցանկանում եմ տալ և տալիս եմ, և զուգընկերը ցանկանում է տալ ու տալիս է: Սիրե՛ք միմյանց, գնահատե՛ք միմյանց, կարողացեք ներել ու միմյանց ընդունել ոչ միայն ուրախության, այլ նաև տխրության մեջ: Այդժամ սերն ու երջանկությունը կդառնան Ձեր մշտական ուղեկիցները ողջ կյանքի ընթացքում: Չէ՞ որ ցանկացած երազանք պայմանավորված է մեր ամենապարզ ցանկությունների իրականացմամբ: Իսկ եթե մի օր կասկածները սկսեն Ձեզ պատել, հիշե՛ք, որ այդ մարդը Ձեր կողքին է, որովհետև ինքներդ եք նրան ընտրել մյուսների միջից, և նա համապատասխանում էր այն ամենին, ինչը կարևոր է հենց Ձեզ համար, իսկ մնացածն ուղղակի մանրուք է, որն արժանի չէ Ձեր ուշադրությանը: