Մետաքսի ճանապարհից մինչեւ Տերակոտե բանակ ու նավահանգիստ՝ առանց ծովի (տեսանյութեր)

Չինաստանի ամենահայտնի մշակութային եւ պատմական կենտրոններից մեկը համարվող Սիանը ավելի քան 3100 տարվա պատմություն ունի եւ կայսերական 13 դինաստիաների կառավարման ժամանակ եղել է Չինաստանի մայրաքաղաքը։ Հենց այստեղից է սկսվել Մետաքսի ճանապարհը։

Հայաստանում Չինաստանի դեսպանության օժանդակությամբ հայաստանյան 7 լրատվամիջոցների ներկայացուցիչներ, այդ թվում՝ NEWS.am-ի թղթակիցը, հուլիսի 7-ից
16-ը մեկնելով Չինաստան, եղել են նաեւ Չենսի նահանգի ամենախոշոր քաղաքում՝ Սիանում, որ թարգմանաբար նշանակում է «Արեւմտյան աշխարհ» ։

Կայարանից դուրս գալուն պես՝ «կլանում» է քաղաքի աուրան՝ մաքուր օդով, հրաշալի բնությամբ, յուրահատուկ շենքերով։ Հատկապես մութն ընկնելուն պես քաղաքի գլխավոր ճեմուղին զբոսնելու է հանում նույնիսկ ամենածույլ տուրիստին։ Այստեղ կյանքը եռում է անգամ կեսգիշերն անց. մարդիկ երգում են, պարում, երեխաները խաղում։

ԶԼՄ ներկայացուցիչներիս այցը Սիան կարելի է պայմանականորեն բաժանել երկու մասի՝ մշակութային եւ տնտեսական։ Քաղաքի իշխանություններն ու Չինաստանի ԱԳՆ-ն արել էին հնարավոր ամեն ինչ, որ 3 օրում մենք տեսնենք առավելագույնը։ Պարզապես անհնար է պատկերացնել, որ կարող ես լինել Սիանում ու չայցելել Տերակոտե բանակ, չտեսնել քաղաքային պատն ու Վայրի սագերի մեծ պագոդան։

Սիանը, որից ժամանակին սկսվել է Մետաքսի ճանապարհը, այսօր նույնպես տնտեսական մեծ նշանակություն ունի Չինաստանի համար։ Ապացույցը Սիանի նավահանգիստն է, որը նոր մետաքսի ճանապարհի կենտրոնական օբյեկտներից մեկն է։ Այն Չինաստանի արեւելյան ափամերձ շրջանները կապում է արեւմտյանի հետ։ Հենց այս նավահանգիստն է միջազգային լոգիստիկայի կենտրոն. չինական կոնտեյներները այստեղից են մեկնում Եվրոպա։ Սիանի միջազգային նավահանգստի քարոզչության բաժնի պետ Լի Թաո խոսքով, այս նավահանգիստը թույլ է տալիս Շենսի նահանգին եւ Չինաստանի արեւմտյան մյուս շրջաններին ակտիվ մասնակցություն ունենալ միջազգային առեւտրին։ Հատկանշական է, որ նավահանգիստը դեպի ծով ելք չունի։ Լի Թաոն ընդգծեց՝ հենց սա է նորարարությունն ու համարձակ քայլը, որ իրենք արել են։

Նավահանգստի տարածքում նաեւ տասնյակ տեղական եւ միջազգային ընկերություններ իրենց մասնաճյուղերն են բացել։ Իշխանություններն այս ընկերություններին շահավետ պայմաններ են առաջարկում, դա է պատճառը, որ ներդրումների ընդհանուր ծավալը արդեն հասնում է շուրջ 2.3 մլրդ դոլարի։ Նավահանգիստն ունի նաեւ կոնտեյներային երկաթգիծ, որի վրա ծախսվել է 100 մլն դոլար։

«Երկաթգծի կառուցման շնորհիվ կոնտեյներներով բեռնափոխադրումների ծավալը տարեցտարի աճում է»,- լրագրողների հետ զրույցում խոսքը եզրափակեց Լի Թաոն։

Նավահանգստից հեռանում ենք՝ հույսով, որ մի օր Հայաստանն էլ կհայտնվի ապրանք ներկրող եւ արտահանող մեծ քարտեզի վրա։