Միշել Օբաման կթողարկի ճարպակալման դեմ ուղղված հիփ-հոփ ալբոմ

ԱՄՆ-ի առաջին տիկինը մանկական և դեռահասային ճարպակալման դեմ պայքարի իր սեփական ծրագրի շրջանակներում, կթողարկի հիփ-հոփ թրեքերի ալբոմ: Այս մասին հաղորդում է «The Holliwood Reporter» ամսագիրը: 

Ամերիկայի նախագահի կինն անձամբ չի ձայնագրվում ալբոմի համար, բայց անձամբ է կատարել այն երաժիշտների ընտրությունը, ովքեր պետք է կատարեն երգերը: Նրանց թվում է թմբկահար Թրեվիս Բարկերը «Blink 182» խմբից, ռեգգի երաժիշտ Մատիսյահուն, «American Idol» երաժշտական ռեալիթի-շոուի հաղթող Ջորդին Սփարքսը և այլ հայտնի երաժիշտներ ու հեռուստաաստղեր, ովքեր միասին կձայնագրեն 19 հայտնի հիփ-հոփ երգ: Դրանց թվում են հետևյալ երգերը.«U R What You Eat»(«Դու այն ես, ինչ ուտում ես»), «Let's Move» («Եկեք շարժվենք»), «We Like vegetables» («Մենք սիրում ենք բանջարեղեն»): 

Ալբոմը կթողարկվի առաջին տիկնոջ` «Եկեք շարժվենք» (Let's Move!) անվանումով ծրագրի շրջանակներում, որի ընթացքում Միշել Օբաման քարոզում է առողջ կենսակերպ` կոչ անելով ճիշտ սնվել և զբաղվել մարմնամարզությամբ: Այս ծրագիրը թողարկվել էր դեռևս 3 տարի առաջ` պայքարելու համար երեխաների և դեռահասների շրջանում տարածված ճարպակալման դեմ: Սա առաջին անգամը չէ, որ իր ծրագրին աջակցելու համար Միշել Օբաման համագործակցում է շոու-բիզնեսի աստղերի հետ: 

Հիշեցնենք, որ ԱՄՆ-ում ճարպակալումից տառապում է ամեն 3-րդ մեծահասակը և ամեն 5-րդ երեխան: «Միայն մենք ենք պատասխանատու այն բանի համար, թե ինչ են ուտում մեր երեխաները, որքան ժամանակ են նրանք  անցկացնում բազմոցի վրա` հեռակառավարման վահանակը ձեռքին: Միայն մենք ենք պատասխան տալիս մեր երեխաների առողջության համար»,-հայտարարել է ԱՄՆ առաջին տիկինը ծրագրի շրջանակներում ունեցած իր ելույթներից մեկի ժամանակ: