Որքա՞ն պղինձ, երկաթ և ոսկի կա Հայաստանի ընդերքում

Միայն Քաջարանի հանքավայրում բացի պղնձից կա ավելի քան 10-15 տեսակի թանկարժեք հանածոներ: Դրանք են ոսկի, գերմանիում, գալիում, ինդիում, թալիում, որոնք ավելի թանկարժեք են, քան միայն պղինձը: Բոլոր այդ մետաղների մշակումը պետության կողմից անտեսվում է: Այս մասին լրագրողների հետ հանդիպման ժամանակ ասաց ԳԱԱ էկոնոմիկային ինստիտուտի մասնագետ, գիտությունների դոկտոր Հրաչյա Ավագյանը:

Պղնձի հինգ հանքավայրերից, երեքում հիմնականում սպառված են, մոտավոր հաշվարկներով մնացել են 20-25 տոկոս, իսկ մյուս երկու հանքավայրերը գտնվում են Վանաձորի մոտակայքում, որոնք դեռ չեն շահագործվում: Պղնձի հանքավայրերում ողջ պղնձի արժեքը կազմում է մոտավոր հաշվարկներով 1 մլրդ. 280 մլն. 206 հազար դոլար: 

Ոսկյա հանքավայրերը մեր երկրում բաժանվում են երկու մասի՝ ոսկյա և բազմամետաղյա հանքեր: Առաջիններում միայն ոսկի և արծաթ են, իսկ բազմամետաղյա հանքերում առկա է նաև ցինկ, պղինձ, կապար: Ոսկյա հանքերը հիմնականում հետախուզված են, իսկ 14 դեռ իրականացվում է հետախուզական աշխատանքներ: Կառավարությունը լիցենզիա է տալիս ցանկացած մարդու ով որոշակի գումար ունի, որպեսզի կատարի հետախուզական աշխատանքներ:

Բանախոսի ներկայացմամբ` ոսկու հանքավայրերից 8-ն այժմ շահագործվում են, դրանցից ամենախոշորը Սոտքն է, որն այժմ շահագործվում է ռուսական «ԳեոՊրոՄայնինգ» ընկերության կողմից, իսկ մինչ դա այն շահագործվում էր հնդկական, կանադական կազմակերպությունների կողմից: «Վերջիններս ցանկանում էին տեղափոխել ոսկու մշակման գործարանը դեպի Սևանի ջրավազանի մոտ: Բարեբախտաբար, ժողովուրդը ընդվզեց և գործարանը չեղափոխվեց: Այժմ ոսկու ընդհանուր պաշարները մասնագետների գնահատվում են 16 349 76800 դոլար»,-ասաց նա:

Ավագյանն ասաց, որ երկաթի հանքավայրերը Հայաստանում դեռ չեն սկսել շահագործվել, սակայն Վ. Այվազյանի թեթև ձեռքով արդեն երեք հանք վաճառվել է չինական կազմակերպություններին: Եթե սկսվի Հրազդան քաղաքի մոտ գտնվող երկաթի հանքի շահագործումը, ապա ողջ Հրազդանը կթունավորվի: Վեց երկաթաքարի հանքավայրերից ուսումնասիրվում են Աբովյանի և Հրազդանի հանքավայրերը: Երկաթի չորս հանքերի ընդհանուր արժեքը 2.5 տրիլիոն դոլար է կազմում: Երկաթի հանքերում առկա է նաև սկանդիում մետաղը, որը երկաթից 20 անգամ թանկ է: