Քննարկում ենք գյուղատնտեսությունը հարկելու խնդիրը․ փոխնախարար
Եթե Հայաստանում նվազագույն կենսաթոշակ է սահմանվում 25 հազար 500 դրամը, դա որոշակիորեն լուծում է գյուղատնտեսությամբ զբաղվողների հարցը, սակայն չի լուծում այն ընդհանրությամբ։ Այս մասին ԱԺ-ում քննարկման ժամանակ աշխատանքի և սոցհարցերի փոխնախարար Սմբատ Սաիյանին հիշեցրեց «Իմ քայլը» խմբակցության պատգամավոր Վիկտոր Ենգիբարյանը։
Փոխնախարարն արձագանքեց, որ այդ խնդիրն առաջացել է 2003-2004 թվականներին։ Մինչ այդ գյուղացիների կենսաթոշակը հաշվարկվում էր նրանց հողի գույքահարկի միջոցով, բայց այդ ժամանակ որոշվեց հանել այդ հարկը, ինչի հետևանքով անհնար դարձավ նրանց համար ստաժ հաշվարկելը։
Ենգիբարյանն արձագանքեց, որ ճիշտ չէ գյուղացիներին հարկելը, այնպես որ այլ բան պետք է մտածել։
«Մեծ հաշվով Դուք կանխեցիք իմ ասելիքը, որովհետև մեծ հաշվով քննարկում ենք գյուղատնտեսությունը հարկելու խնդիրը։ Այսինքն` եթե լուծվի էդ խնդիրը, ու գյուղատնտեսական նշանակության հողի սեփականատերը, ով իր հողը մշակում է իր տան դիմաց, ինքը պիտի որոշակի հարկեր և տուրքեր վճարի, որպեսզի դրա դիմաց նրա համար հաշվարկվի ստաժ», – ասաց փոխնախարարը։