Կառավարությունն այսօր արտահերթ նիստ կանցկացնի. ի՞նչ հարցեր են օրակարգում

Հայաստանի կառավարությունն այսօր՝ մարտի 25-ին, արտահերթ նիստ կանցկացնի: Նիստի օրակարգում այս պահի դրությամբ 7 հարց է: Օրակարգային հարցերից 5-ն են զեկուցվող:

Արտահերթ նիստում Կառավարությունը կքննարկի ՀՀ գյուղատնտեսության նախարարությանը գումար հատկացնելու, պետական բյուջեում վերաբաշխում իրականացնելու, ՀՀ կառավարության որոշումների մեջ փոփոխություններ ու լրացումներ կատարելու հարցերը:

«ՀՀ կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ ու լրացումներ մասին» նախագծում նշված է, որ վերոնշյալ որոշման մեջ տեխնիկական և ծրագրային թերությունների պատճառով Արտակարգ իրավիճակների նախարարության որոշ ծրագրերը ըստ բյուջետային հատկացումների գլխավոր և ստորադաս կարգադրիչների կատարողների ճիշտ չեն ներառվել համապատասխան հավելվածներում: Սույն որոշման նախագծով առաջարկվում է կատարել փոփոխություններ և լրացումներ՝ համապատասխան հավելվածներում ճշգրտումներ կատարելու համար:

«ՀՀ գյուղատնտեսության նախարարությանը գումար հատկացնելու, Հայաստանի Հանրապետության 2019 թվականի պետական բյուջեում վերաբաշխում և Հայաստանի Հանրապետության կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ և լրացումներ կատարելու մասին» նախագծով նախատեսվում է Գյուղատնտեսության զարգացման հիմնադրամի լուծարման գործընթացով պայմանավորված պարտավորությունների մարմանն աջակցելու նպատակով ՀՀ գյուղատնտեսության նախարարությանը ՀՀ 2019 թվականի առաջին կիսամյակում հատկացնել 52 200.0 հազար ՀՀ դրամ, որից առաջին եռամսյակում՝ 44,720.0 հազ.դրամ՝ պետական բյուջեով նախատեսված ՀՀ կառավարության պահուստային ֆոնդի հաշվին:

«ՀՀ կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ և լրացումներ կատարելու մասին» նախագծով նախատեսվում է ՀՀ 2019 թվականի պետական բյուջեով «Աուտիզմ և զարգացման այլ խանգարումներ ունեցող երեխաների բուժման, վերականգնման, կրթության և զբաղվածության ապահովում» ծրագրով «Աուտիզմ ազգային հիմնադրամ»-ին առանց մրցույթի, որպես դրամաշնորհ հատկացնել 44,326.7 հազար դրամ:

«ՀՀ կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ և լրացումներ կատարելու մասին» նախագծով առաջարկվում է ՀՀ 2019 թվականի պետական բյուջեով «Դպրոցներում STEM կրթության և ռոբոտատեխնիկայի զարգացման իրականացում» ծրագրով «Առաջատար տեխնոլոգիաների ձեռնարկությունների միություն» ՀԿ-ին առանց մրցույթի, որպես դրամաշնորհ հատկացնել 352,226.5 հազար դրամ:

«ՀՀ կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ և լրացումներ կատարելու մասին» նախագծով Կառավարությանն առաջարկվում է «1148 Արտադպրոցական դաստիարակության» ծրագրի «11006 Արտադպրոցական դաստիարակություն հասարակական կազմակերպությունների կողմից» միջոցառման իրականացման համար 2019 թվականի պետական բյուջեից 626,311,000 ՀՀ դրամի չափով ֆինանսական հատկացումը նախատեսված է հատկացնել դրամաշնորհային մրցույթի արդյունքում հաղթող ճանաչված կազմակերպություններին: