Մարշալներ Բաղրամյանի և Կոնևի թոռներին վրդովվեցրել է Comedy Woman-ի անգրագետ կատակը

Մարշալներ Հովհաննես Բաղրամյանի և Իվան Կոնևի թոռները դիմել են Ռուսաստանի քննչական կոմիտե` հայց ներկայացնելով ռուսական ТНТ հեռուստաալիքի դեմ: Այս մասին հայտնում է life.ru-ն։
Խորհրդային զինվորականների ժառանգներին վրդովվեցրել է Comedy Woman հաղորդման ժամանակ արված կատակը:

Ըստ աղբյուրի՝ շոուի երկրորդ սեզոնի 11-րդ թողարկման ժամանակ դերասանուհի Նատալյա Մեդվեդևան պատմում է, թե գումար է հավաքում թաղման համար և լավ գիտի, թե ինչպես պետք է կազմակերպել հուղարկավորությունը։ «Ես դեռ դպրոցում, երբ Անֆիսա անունով առնետին թաղեցի, այնպիսի հուղարկավորություն էի կազմակերպել, որ մարդիկ պարզապես նախանձից մեռան: Առնետի համար տեղ էի փորել Կրեմլի պատի մեջ` Եժովի և Կոնևի միջև»,- կատակում է աղջիկը:

Բաղրամյանի թոռը` Իվան Սերգեևիչը հայտարարել է, որ կատակը ոչ միայն տեղին չէ, այլև անգրագետ է: «Նիկոլայ Եժովը թաղված է ոչ թե Կրեմլի պատի մեջ, այլ Դոնսկոե գերեզմանոցում: Սցենարիստը, որը գրել է այդ տեքստը դերասանների համար, չի տիրապետում իրավիճակին»,-ասել է նա։

Նա նաև հավելել է, որ Հաղթանակի զորահրամանատարների հիշատակի հիմնադրամը ձգտում է պայքարել Հայրենական մեծ պատերազմին մասնակցած զինվորականների վարկաբեկման դեմ։