Ջրի համաշխարհային օրն առիթ է հիշեցնելու համար, որ Արարարտյան դաշտի արտեզյան ջրային ավազանն իջել է 10 մետրով
Ինչպես հայտնի է, այսօր աշխարհում նշվում է Ջրի համաշխարհային օրը: Այս տարվա կարգախոսն է` «Ոչ ոք անտեսված չի մնա»: Հայտնի է, որ Հայաստանում դեռևս կան մարտահրավերներ՝ կապված ջրի հասանելիության ապահովման և ջրային ռեսուրսների արդյունավետ կառավարման հետ: ԱՄՆ ՄԶԳ ներկայացուցիչներն ուսումնասիրություններ են կատարել հատկապես Արարատյան դաշտի ավազանում՝ պարզելու համար, թե ի՞նչ վիճակում է ավազանը: Արձանագրվել է, որ ջրառը մինչև 2016 թվականը եղել է սահմանված չափից 45 տոկոսով ավելին:
«Ծրագրի ընդհանուր արժեքը 5 մլն դրամ է, հիմնական թիրախային մարզերն Արարատի և Արմավիրի մարզերն են: Առաջին փուլում հաշվառվել են 2800 հոր, 235 ձկնաբուծարան: Պիլոտային ծրագրերի արդյունքում 9.2 մլն խմ ջուր է խնայվել», – ասել է ԳԱՏՕ ծրագրի ղեկավար Մագդա Ավետիսյանը:
Հիշեցնենք, որ 80-ականների համեմատությամբ՝ արտեզյան ավազանի մակարդակն իջել է 10 մետրով:
«Պետք է հաշվարկվի ամեն կաթիլ, և ջուրը հասանելի լինի այնքան, ինչքան էներգիան: Նախատեսվում է ջրային ռեսուրսների կառավարման ռազմավարություն մշակել, որն իր մեջ կներառի նաև ջրամբարաշինությունը», – ասել է միջացառմանը մասնակցող ՀՀ բնապահպանության նախարար Էրիկ Գրիգորյանը՝ հավելելով, որ որոշակի քայլեր ձեռնարկվում են ջրային ռեսուրսները պահպանելու և արդյունավետ օգտագործելու ուղղությամբ:
Հավելենք, որ որոշ մասնագիտական հաշվարկների համաձայն՝ Հայաստանում տարեկան 7.5 մլն խմ ջուր է մշակվում, որից կարողանում ենք օգտագործել առավելագույնը 2 մլն խմ-ն: Մեծ մասն Արաքս գետով հոսում է Թուրքիա, որտեղ` հենց սահմանին, ջրամբարներ են կառուցվում ամբարելու համար: