Շիրակի պետական համալսարանի ռեկտորի մրցույթը կկայանա մայիսի 11-ին
Այսօր մոտ 7 ժամ տևողությամբ նիստի ընթացքում Շիրակի պետական համալսարանի հոգաբարձուների խորհուրդը քննարկել է ռեկտորի թափուր պաշտոնին առաջարկվող պահանջների և մրցույթի անցկացման կարգի փոփոխության հարցերը: Թեկնածուներին ներկայացվող պահանջները մնացել են անփոփոխ, փոխվել են փաստաթղթերի ընդունման ժամկետներն ու ընթացակարգը:
Փաստաթղթերի ընդունումը հանձնաժողովը սկսելու է մրցույթի անցկացման մասին հայտարարություն տարածելուց 15 օր հետո: Ի տարբերություն մինչ այս գործող ընթացակարգի՝ հայտատուների հավակնորդ համարվելու իրավասությունը դրված էր հոգաբարձուների խորհրդի նախագահի վրա, այժմ, ըստ փոփոխված կարգի, հավակնորդների թեկնածու դառնալու հարցը որոշվելու է հոգաբարձուների նիստում՝ հայտերի բացման օրը:
Այս անգամ մրցույթին մասնակցության իրավունք ստացած թեկնածուների փաստաթղթերն ու հայեցակարգը կհրապարակվի ՇՊՀ կայքում և հասանելի կլինի հանրության համար: Քվեաթերթիկում, ի տարբերություն նախորդ մրցույթի, այս անգամ երկու և ավելի թեկնածուի դեպքում կլինի նաև «բոլորին դեմ եմ» տողը, իսկ հավակնորդների փաստաթղթերը կընդունվեն ոչ թե նախկին ընթացակարգով մրցույթի մասին հայտարարության հաջորդ օրը, այլ վերջին հինգ օրվա ընթացքում:
Եվ այսպես, ՇՊՀ հոգաբարձուների խորհրդի որոշմամբ ռեկտորի թափուր պաշտոնի համար մրցույթի հայտարարությունը կհրապարակվի մարտի 22-ին, իսկ մրցույթը կկայանա մայիսի 11-ին: Փակ և գաղտնի քվեարկությամբ հաղթող կճանաչվի այն թեկնածուն, որը կստանա հոգաբարձուների խորհրդի 24 անդամների կեսից ավելիի քվեն, այսինքն՝ առնվազն 13 ձայն: