Պաշտոնյաները սեփականաշնորհել էին Մեղրիի ազատ տնտեսական գոտու շուրջ հողերը․ վարչապետ
Հայաստանում գործնական քայլեր են իրականցվելու օտարված հողերը վերադարձնելու ուղղությամբ, որոնք չեն օգտագործվում։ Նորվեգացի լրագրողի հարցին պատասխանելիս այս մասին այսօրվա ասուլիսին ասաց վարչապետ Նիկոլ Փաշինյանը։
Նա ասաց, որ չնայած Մեղրու ազատ տնտեսական գոտու մասին լայն լուսաբանմանը, ինքն այնտեղ այցի ժամանակ հասկացել է, որ այդ գոտին չունի տարածք, որտեղ հնարավոր է գործունեություն ծավալել։ Փաշինյանի խոսքերով՝ կարևոր բացահայտումներ են եղել այդ հարցով զբաղվելիս։
«Պարզվեց, որ մի շարք ձեզ հայտնի բարձրաստիճան պաշտոնյաներ Մեղրու ազատ տնտեսական գոտու տարածքի շուրջ եղած ամբողջ հողերը սեփականաշնորհել են՝ որպես կառավարության ներկայացուցիչ իմանալով, որ այդտեղ այդպիսի նախագիծ է իրականացվելու։ Ընդ որում՝ սեփականաշնորհել են ծիծաղելի գներով»,- ասաց Փաշինյանը։
Վարչապետն ասաց, որ առաջին քայլը, որ արել են, վաղը լրատվամիջոցներում ու սոցցանցերում քննադատության պատճառ կդառնա, ու բացահայտեց, թե ինչի մասին է խոսքը։
«Առաջին բանը՝ ուղղակի լուր ուղարկեցինք, ասացինք՝ էս չի կարող սենց լինել, ուղղակի եկեք, կամավոր վերադարձրեք էդ հողերը պետությանը, խնդրեցինք քաղաքավարի։ Եվ նրանք մերժեցին։ Շատ լավ, մենք ասացինք, ուրեմն ավելի մանրամասն կծանոթանանք էդ գործարքների հետ»,- ասաց Փաշինյանը։
Վարչապետի խոսքերով՝ ավելի մանրամասն ծանոթությունից հետո քրեական գործ է հարուցված, ու կասկած չկա, որ կապացուցվի, որ եղել է չարաշահում։