Եթե չհաջողվեր բանակը զերծ պահել ներքաղաքական գործընթացներից, Ռոբերտ Քոչարյանին կմեղադրեին անգործության մեջ. Ռուբեն Սահակյան
«Պաշտպանության բանակը իրավունք չունի խառնվել ներքին հարցերին, անվտանգության հարցերը միայն սահմաններին պետք է լինեն: Ովքեր այդպես են ասում, դա կատարյալ անգրագիտություն է: Եթե այդպես ասում են, թող հղումներ կատարեն օրենքներին, մենք հղում ենք կատարում ու ասում ենք՝ դա նաև ներքին հարց է»,- այսօր լրագրողների հետ զրույցում նշեց ՀՀ երկրորդ նախագահ Ռոբերտ Քոչարյանի փաստաբան Ռուբեն Սահակյանը:
Նա նշեց, որ իրենք ոչ միայն ներքին օրենքներին են հղում կատարում, այլև միջազգային փաստաթղթերին: Սահակյանն ասաց, որ այս քրեական գործը «ջուր է»: Նա ընդգծեց՝ հայտնի 0038 հրամանն իր մեջ որևէ հանցավոր բան չի պարունակում, նշեց՝ դրա բացատրությունն ավելի լավ, քան տվել է Սեյրան Օհանյանը, չի կարող տրվել:
Լրագրողները հետաքրքրվեցին՝ դատական այս նիստի ժամանակ երկրորդ նախագահը ելույթով հանդես գալո՞ւ է, ինչին պաշտպանը պատասխանեց.
«Ինքը միշտ էլ ելույթով հանդես է եկել, երբեք չի թաքցրել ինչ կա, առաջին իսկ նիստում նա մի չքնաղ ելույթ ունեցավ, որ եթե բարձրաձայնեմ, թե ինչ ասեց, կստացվի, որ նախաքննության գաղտնիք բացահայտեցի»:
Սահակյանը, սակայն, երկրորդ նախագահի ելույթներից մեկ օրինակ բերեց:
«Օրինակ՝ այն, որ ինքը ճիշտ է եղել, երբ հրավիրել է խորհրդակցություն՝ իմանալով հանդերձ և ստանալով հաղորդագրություն Ազգային անվտանգության ղեկավարի կողմից, որ երկրապահը ոտքի է կանգնել, որ փորձում են միանալ ժողովրդին, որ մարդիկ զինված են: Ես անձամբ տեսել եմ, դուք էլ տեսած կլինեք, որ խոսքը գեներալ Մանվելի և Մելքոնյանի մասին է: Հատուկ գնդի 80 տոկոսը միացել էր ցուցարարներին: Ի՞նչ է նշանակում՝ զինվորականները միացել էին ցուցարարներին, ի՞նչ իրավունքով, չէ՞ որ նրանք դուրս են քաղաքականությունից»,- ասաց նա:
Պաշտպանը հայտնեց, որ երկրորդ նախագահն այդ ժամանակ ասել է՝ միջոցներ ձեռնարկեք, որ բանակը չներքաշվի գործընթացներին, և դա իրեն հաջողվել է:
«Պատկերացնում եմ՝ չստացվեր, նրան կմեղադրեին անգործության մեջ, քանի որ հանցանքը կարող է գործվել գործողության և անգործության միջոցով»,- նշեց պաշտպանը:
Սահակյանը պատասխանեց հարցին՝ ինչո՞ւ իրենք չեն կարողանում այս քրեական գործի հաջող արդյունքի հասնել:
«Ե՞րբ է փաստաբաններին այդքան հեշտ եղել հասնել արդարության, երբեք, ո´չ Լևոն Տեր-Պետրոսյանի, ո´չ Ռոբերտ Քոչարյանի, ո´չ Սերժ Սարգսյանի, ո´չ էլ Նիկոլ Փաշինյանի օրոք: Երբե´ք այդ հաջողությանը չենք հասնելու, երբե´ք: Ես սպասում էի, որ այդ փոփոխությունը կլինի, ասում էի՝ թող մարդուն մեղադրեն այն բանի համար, ինչ արել է, չավելացնեն, չպակասեցնեն: Մի հատ հարց տվեք՝ Հարությունյան Միքայելի գործը կուղարկե՞ն Մոսկվա, թե՞ ոչ: Որովհետև եթե հանձնեն այնտեղ, գործի ջուրը կբացվի, այնտեղի փաստաբանները կճղեն էս գործը»,- ասաց նա:
Պաշտպանն անդրադարձավ նաև գործարար Սիլվա Համբարձումյանի՝ երկրորդ նախագահին կաշառք տալու մասին հայտարարություններին: Հարցին՝ ի՞նչ կա այդ գործից, նա պատասխանեց.
«Дырка от бублика: Դուք չե՞ք լսել Սիլվային, լսել եք, չէ՞, ինքն ասո՞ւմ է՝ ես Ռոբերտ Քոչարյանին փող եմ տվել, ասո՞ւմ է՝ անձամբ փող եմ տվել: Աստված ոչ անի ձեզ այդպես մեղադրեն, ձեր հարազատին այդպես մեղադրեն: Եթե հիմնականը չկա, մնացածը զրոյական է»