Ադրբեջանի բանակի զորավարժությունների հիմնական նպատակը ռազմական պատրաստությունն է. Վրթանեսյան
Ադրբեջանի բանակի խոշոր զորավարժության նպատակը ոչ այնքան մեսիջներ ուղարկելն է, որքան հենց ռազմական գործողություններին պատրաստվելը: Սրան պետք է ուշադրություն դարձնել, քանի որ ցանկացած պահի Ադրբեջանը կարող է ռազմական գործողություններ սկսել: Այս մասին այսօրվա ասուլիսի ժամանակ ասաց Razm.info մասնագիտացած կայքի համակարգող Կարեն Վրթանեսյանը:
Վերլուծաբանն Ապրիլյան պատերազմի օրինակով հիշեցրեց, որ հակառակորդը չի խորշում կորուստներ ունենալուց, և դա հնարավորություն է տալիս նրան իշխանության ունեցած տարբեր դիրքորոշումներից կախված` սկսել ռազմական գործողություններ:
Կայքի վերլուծաբան Հայկ Խաչիկյանն ասաց, որ զորավարժություններին խաղարկվել են հայկական պաշտպանության ճեղքման դրվագներ: Իսկ ներգրավված զինատեսակների մեջ եղել են նաև հայտնի «Պոլոնեզ» և «Լորա» հրթիռային համալիրները: Խաչիկյանի խոսքով` այս զինատեսակներն առաջին անգամ չէ, որ կիրառվում են զորավարժությունների ժամանակ: Վերլուծաբանի խոսքով` այս զինատեսակները գրեթե նույն սցենարով զորավարժություններում կիրառվել են դեռ նախորդ տարի:
Կարեն Վրթանեսյանն այս օրինակների վրա հիշեցրեց, որ Ադրբեջանը պատրաստվում է պատերազմի նաև սպառազինություն գնելով, և ադրբեջանական հանրությունը դրանով չի պատրաստվում խաղաղության: Այս զինատեսակները, ըստ վերլուծաբանի, Ադրբեջանը նաև գնել է հենց հայկական սպառազինության մեջ եղած «Իսկանդեր» հրթիռներին հակակշռելու համար: