ԾԻԳ-ը փակում ենք, ՓԲԸ ենք ստեղծո՞ւմ. թեժ քննարկում Կառավարությունում

Կառավարության այսօրվա նիստում ՀՀ գյուղատնտեսության նախարարի պարտականություններն իրականացնող Գեղամ Գևորգյանի զեկուցած «Հայաստանի Հանրապետության գյուղատնտեսության նախարարության «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի գործունեությունը դադարեցնելու, Հայաստանի Հանրապետության գյուղատնտեսության նախարարության գործառույթներ վերապահելու և Հայաստանի Հանրապետության կառավարության 2011 թվականի ապրիլի 28-ի N 461-Ն որոշումն ուժը կորցրած ճանաչելու մասին» նախագիծը բուռն քննարկման առարկա դարձավ: Նախագծով առաջարկվում էր «Հայաստանի Հանրապետության գյուղատնտեսության նախարարության «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի գործունեությունը դադարեցնելուց հետո նրա գործառույթների մի մասը փոխանցել նախարարությանը, մի մասը վերապահել «Գյուղական ֆինանսավորման կառույց» փակ բաժնետիրական ընկերությանը։

ՀՀ ֆինանսների նախարար Ատոմ Ջանջուղազյանի գնահատմամբ՝ առաջարկվում է գրասենյակը փակել, փոխարենը ստեղծել ընկերություն, փաստացի՝ անվան փոփոխությունից բացի, որևէ բովանդակային փոփոխություն տեղի չի ունենում:

«Այսինքն՝ ԾԻԳ-ը փակում ենք, ՓԲԸ ենք ստեղծո՞ւմ»,- հետաքրքրվեց ՀՀ վարչապետ Նիկոլ Փաշինյանը՝ նշելով, որ միայն անվան հիմնավորումը բավարար չէ նոր ընկերություն ստեղծելու համար:

Գևորգյանը նշեց, թե այդ ձևակերպումը շփոթմունք է առաջացնում, և այդքան էլ այդպես չէ:

«Այդ ԾԻԳ-ը երկու մասից է բաղկացած, մեկը լուծարվում է, գործառույթները գալիս են նախարարությանը, այսինքն՝ մենք ընդամենը գործառույթների մի մասով, որ չի կարող իրականացնել նախարարությունը, դրա համար ստեղծում ենք ՓԲԸ»,- ասաց նա:

Գևորգյանին վարչապետը հարցեր ուղղեց՝ ԾԻԳ-ի այդ հատվածը ի՞նչ էր անում, ՓԲԸ-ն ի՞նչ է անելու, ինչո՞ւ դա պետք է արվի և ինչո՞ւ չի կարող անել նախարարությունը կամ պետական սովորական շրջանակի մեջ գտնվող որևէ կառույց՝ բանկերի միջոցով:

Դիտարկմանը, թե այդ կառույցը բանկին «էժան փող է տալիս», վարչապետն արձագանքեց.

«Հիմա կառավարությունը չի՞ կարող բանկին տալ փողը, ասել՝ տալիս եմ, որ մաքսիմում էս տոկոսով ֆինանսավորես: Գործ ունենք արտապատվիրակված լիազորության հետ, իրար մեջ աշխատում են, իրար հետ աշխատում են, մենք էդ ընթացքում ի՞նչ ենք անում, էդ ի՞նչ է որ, կներեք, պարզապես ուժայիններին հայացքս ընկավ, դրա համար եմ ասում՝ «հատուկ սպեցնազ» ենք ձևավորում այդ գործառույթի համար»:

Ի վերջո, Կառավարության ղեկավարն արձանագրեց՝ ակնհայտ է, որ պատրաստ չեն այս հարցով որոշում կայացնելու, պետք է լուծումը գտնել: Նա առաջարկեց հարցը հանել օրակարգից, ի պատասխան՝ Գևորգյանը նշեց, որ ապրիլի 1-ից կկանգնեն մի խնդրի առաջ, որ նշված կառույցի աշխատողներին աշխատավարձ չի կարողանա վճարել, քանի որ ԾԻԳ-ը կլուծարվի, նոր կառույց չի ստեղծվի: Փաշինյանն առաջարկեց արագ լուծում գտնել, հարկ եղած դեպքում արտահերթ նիստ հրավիրել, խնդիրը կարգավորել: