ԱԺ պետական-իրավական հարցերի մշտական հանձնաժողովն արտահերթ նիստ է հրավիրել
ԱԺ պետական-իրավական հարցերի մշտական հանձնաժողովը մարտի 13-ին Վլադիմիր Վարդանյանի նախագահությամբ կայացած արտահերթ նիստում քննարկել եւ դրական եզրակացություն է տվել կառավարության հեղինակած «Հանրային ծառայության մասին» ՀՀ օրենքում փոփոխություններ կատարելու մասին» օրենքի նախագծին:
Հիմնական զեկուցող, ՀՀ արդարադատության նախարարի տեղակալ Սուրեն Քրմոյանը նշել է, որ 2017 թվականին ընդունվել է «Կոռուպցիայի կանխարգելման հանձնաժողովի մասին» ՀՀ օրենքը, որով, սահմանադրական կարգավորումների համատեքստում, նախատեսվում է ինքնավար մարմնի՝ Կոռուպցիայի կանխարգելման հանձնաժողովի ձեւավորում: Զեկուցողը տեղեկացրել է, որ մինչ օրս հանձնաժողովը չի կազմավորվել, իսկ «Հանրային ծառայության մասին» 2018 թվականի օրենքով՝ գույքի, եկամուտների և շահերի հայտարարագրման կարգավորումները գրեթե ամբողջությամբ պայմանավորվել են հանձնաժողովի կազմավորմամբ:
Ըստ Սուրեն Քրմոյանի՝ ստեղծվել է մի իրավիճակ, որի արդյունքում Բարձրաստիճան պաշտոնատար անձանց էթիկայի հանձնաժողովն իրավասու չէ ընդունելու պաշտոնատար անձանց և նրանց ընտանիքի անդամների կողմից ներկայացված հայտարարագրերը: Նա նշել է, որ գործող օրենքով հայտարարատու պաշտոնատար անձինք պաշտոնավարման ընթացքում տարեկան հայտարարագրերը ներկայացնում են մինչև տվյալ տարվան հաջորդող տարվա մարտի 31-ը և ակնհայտ է դառնում, որ 2018 թվականի հայտարարագրերի ներկայացման առումով՝ գործնականում տվյալ պահին մեխանիզմներ առկա չեն:
Զեկուցողի խոսքով՝ հայտարարագրերի ներկայացման գործընթացի կասեցումը շատ լուրջ հետեւանքներ կունենա ինչպես վարչական վարույթների և համապատասխան քրեական գործերի հարուցման, այնպես էլ միջազգային կազմակերպությունների գնահատման տեսանկյունից:
Նշյալ օրենքը ուժի մեջ է մտել 2019թ. հունվարի 1-ին, սակայն գործնականում չի կիրառվել: Ներկայացված օրինագծով գործադիրն առաջարկում է օրենքի ուժի մեջ մտնելու ժամկետը նախատեսել 2020 թվականի հունվարի 1-ը:
Նախագծի ընդունման արդյունքում ժամանակավոր լուծում կտրվի ստեղծված իրավիճակին, կապահովվի հայտարարագրման համակարգի բնականոն գործունեությունը:
Հարակից զեկույցում հանձնաժողովի նախագահ Վլադիմիր Վարդանյանը տեղեկացրել է, որ հարցի առնչությամբ նախօրեին տեղի է ունեցել աշխատանքային քննարկում:
Հանձաժողովի նախագահը ներկայացրել է մի շարք տեխնիկական բնույթի առաջարկներ, որոնք ամբողջությամբ ընդունվել են կառավարության կողմից: