Առաջին անգամ Հայաստանի նոր իշխանությունն Արցախի հարցում հստակ ուղերձ հղեց. Մարուքյանը՝ ԱԽ նիստում Փաշինյանի ելույթի մասին
Արցախում Անվտանգության խորհրդի նիստ անցկացնելը կարեւոր ուղերձ է` հատկապես ԵԱՀԿ Մինսկի խմբի համանախագահների հայտարարությունից հետո: Այս մասին, այսօր՝ մարտի 13-ին, ԱԺ-ում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:
Ըստ նրա՝ նիստում վարչապետ Նիկոլ Փաշինյանի ելույթը համապարփակ, հստակ ուղերձներով, հստակ շեշտադրումներով ելույթ էր. «Երեւի թե առաջին անգամ համակարգված ձեւով Հայաստանի նոր իշխանությունն Արցախի հարցում հստակ ուղերձ հղեց: Այն ուղղված էր միջազգային հանրությանը, Ադրբեջանին: Դա ներքին օգտագործման ուղերձներ չէին, արտաքին էին: Այդ առումով սպասում ենք բանակցություններին: Մենք ասել ենք, որ Արցախի վերադարձը բանակցային սեղան «Լուսավոր Հայաստանի» համար առջնահերթություն է, մենք աջակցում ենք այդ հարցում իշխանությանը: Արցախի խնդրում հայաստանում կա հստակ կոնսենսուս եւ աջակցություն օրվա իշխանությանը»:
Ինչ վերաբերում է Փաշինյան-Ալիեւ սպասվող հանդիպմանը, Էդմոն Մարուքյանն ասաց, որ առանձնակի մեծ արդյունքներ չի ակնկալում. «Վարչապետի խոսքում հարցեր բարձրացվեցին կապված սկզբունքների եւ տարրերի հետ առ այն, որ դրանք պետք է մեկնաբանվեն միջազգային հանրության կողմից եւ դրանք չպետք է լինեն կողմերի կողմից տարբեր շահեր հետապնդող մեկնաբանություններ: Այսինքն ինչ նկատի ունենք այդ սկզբունքների տակ»,-ասաց Մարուքյանը:
Հարցին, թե մինչեւ այսօր պարզ չէ՞ր, թե ինչի շուրջ էին բանակցությունները, պատգամավորը նշեց. «Մինչեւ այսօր կարող է՝ պարզ են եղել մինչեւ այսօր բանակցողների համար, բայց նոր իշխանությունը նոր է սկսում բանակցությունը, առաջին հանդիպումն է լինելու: Կարող է լինել պարզաբանում, թե ինչ նկատի ունեն յուրաքանչյուրս սկզբունքի տակ»:
Իսկ, թե Արցախը բանակցային սեղանի շուրջ վերադարձնելու շանսեր կա՞ն, ասաց, որ միջազգային հանրության հետ հայկական կողմը դիվանագիտական եւ խորհրդարանական հարթակներում պետք է բանակցություններ տանի:
«Չպետք է սպասել, որ Ալիեւը, ադրբեջանական կողմը ասի`դե լավ, որ ասում եք, թող գան բանակցեն: Այդպես չի լինում: Պետք է հստակ աշխատանք տանել բոլոր հարթակներում, լոբբինգ անել, որ առանց Արցախի ներկայացուցչի չեն կարող լինել արդյունավետ բանակցություններ, որը կարող է պտուղ տալ: Քանի դեռ Յոհաննես Հաննից սկսած՝ մինչեւ ՄԱԿ-ի գլխավոր քարտուղար ու միջազգային հանրության այլ ներկայացուցիչներ, չեն ասում`բայց կարծում եմ, որ Արցախը պետք է վերադառնա… եթե նրանք միակարծիք լինեն, Ադրբեջանին այլ տարբերակ չի մնա»,-ասաց Մարուքյանը:
Նա հավելեց, որ խնդրի լուծման համար բավարար չէ, որ Արցախը մասնակցի, բոլոր կողմերը պետք է համաձայն լինեն լուծման տվյալ տարբերակին: