Քննիչից իմացա, որ Լևոն Երանոսյանն է Բաղրամյան պողոտայում ժողովրդի մեջ լուսաձայնային նռնակներ նետած անձը. Ալեն Սիմոնյան
ԱԺ փոխնախագահ Ալեն Սիմոնյանը ֆեյսբուքյան իր էջում գրառում է կատարել՝ տեղեկացնելով, որ Լևոն Երանոսյանն է այն անձը, որը Բաղրամյան պողոտայում լուսաձայնային նռնակներ է կիրառել:
Գրառումն ամբողջությամբ ներկայացնում ենք ստորև.
«Օրեր առաջ քննիչից իմացա, որ ըստ նախաքննության տվյալների՝ Լևոն Երանոսյանն է այն անձը, ով Բաղրամյան փողոցում ժողովրդի մեջ լուսաձայնային նռնակներ է նետել, որից տուժել եմ ոչ միայն ես, այլ նաև տասնյակ մարդիկ:
Դիտեցի նաև տեսանյութը, թե ինչպես և ինչ ջանասիրությամբ է նետում դրանք:
Սկզբում ինձ վիրավորում հասցրած նռնակն էր, հետո տեսա՝ ինչպես մեկ այլ նռնակ հայտնվեց իմ ընկեր Արայիկ Հարությունյանի ծնողների ոտքերի տակ, և տիկին Մարինան միայն հասցրեց փակել ականջները... շարունակությունը դիտել չկարողացա, հրաժարվեցի, թեկուզ որպես տուժող կարող էի ծանոթանալ նյութերին:
Գործն արդեն դատարան է ուղարկվել»: