ՀՀ դեսպանը Հաագայի փոխքաղաքապետին շնորհակալություն է հայտնել հայկական ասացվածքը քաղաքի կենտրոնում փորագրելու համար
Մարտի 5-ին Նիդերլանդներում ՀՀ դեսպան Տիգրան Բալայանը «Աբովյան» միության ղեկավար Մաթո Հախվերդյանի և Հոլանդահայ կազմակերպությունների ֆեդերացիայի քարտուղար Ինգե Դրոստի (Inge Drost) հետ միասին ներկա է գտնվել Հաագայի կենտրոնում՝ HS երկաթուղային կայարանի հարակից տարածքից ձգվող «Հին կենտրոնի գորգի» բացման արարողությանը։
Միջոցառման շրջանակներում Տիգրան Բալայանը զրույց է ունեցել Հաագայի փոխքաղաքապետ Ռիչարդ դե Մոսի (Richard de Mos) հետ, որին շնորհակալություն է հայտնել հայկական «Ջուրն իր ճանապարհը կգտնի» ասացվածքը հայերենով Հաագայի կենտրոնում հավերժացնելու համար, ինչը, դեսպանի բնորոշմամբ, յուրատեսակ գնահատանք է քաղաքի զարգացման գործում իրենց ներդրումը բերած հայերին։ Դեսպանը Հաագայի փոխքաղաքապետին ներկայացրել է հայ-հոլանդական փոխգործակցության ընդլայնմանն ուղղված նախաձեռնությունները։
Հաագայի փոխքաղաքապետը ողջունել է Հայաստանի դեսպանի ներկայությունը քաղաքի համար կարևոր իրադարձությանը և պատրաստակամություն հայտնել քննարկելու համագործակցության հաստատման հնարավորությունները։
«Հին կենտրոնի գորգն» իրենից ներկայացնում է Հաագայի HS երկաթուղային կայարանի հարակից տարածքից ձգվող մայթեզրերին ճանապարհի մասին 34 լեզուներով ասացվածքների փորագրումը։ Լեզուների և ասացվածքների ընտրությունն իրականացվել է Լեյդենի համալսարանի հատուկ հանձնախմբի կողմից։