Գնում, գործ եմ ուզում ինձ ասում ա գնա զիբիլ թափի. Ազատամարտիկը հացադուլ է հայտարարել. պահանջում է Արարատի քաղաքապետ Հայկ Հայկյանի հրաժարականը

Արարատ համայնքի բնակիչ, ազատամարտիկ Անդրանիկ Օհանյանը արդեն երեք օր է հացադուլ է հայտարարել. պահանջում է քաղաքապետ Հայկ Հայկյանի հրաժարականը:

«Մի հանրապետականը գնում է մյուսն է գալիս, սաղ ամբողջ կլուբը իրա կնիկը, քուրը ազգ ու տակը բյուջեից սաղ իրանք են սնվում: Ավարատած տղա եմ գալիս եմ գործ եմ ուզում, ասում ա գնա զիբիլ թափի»,- Operativ.am-ի հետ զրույցում ասաց Օհանյանը:

Օհանյանը 25 տարի ՌԴ-ում արտագնա աշխատանքով է զբաղվել: Նրա խոսքով՝ նա արդեն 3 տարի աշխատանք է խնդրում քաղաքապետից, ինչպես նաև ապաստարան, քանի որ վարձով է ապրում և ի վիճակի չէ վարձը տալ. բուժման ծախսերն է հոգում:

«Շանտաժով տուն տեղս տարել են, ես ոչ մի բան չեմ կարողանում անել: Ասում եմ գոնե հանրակացարանում ինձ մի սենյակ տրամադրեք, ասում ա՝ չկա: Հիմա նստել եմ հացադուլ, արդեն գալիս են իր կոլեգաներից բան են անում իբր թե արի քեզ աշխատանք տանք, արի քեզ սենյակ տանք, մենակ մեր դեմ մի հելի: Ասի դու սաղ բյուջեի փողերը քո շուն ու կատուները, խոզ. ինչ պահում ես սաղ օգտվում են բյուջեից, քո բյուջեն սարքել ես փարոս, խի չե՞նք տեսնում՝ ինչ ես անում դու»:

Օհանյանը ունի մի քանի հիվանդություն և հացադուլի ընթացքում իրեն ավելի տկար է զգում. «Ես եթե մի քանի օր էլ սենց մնամ, կարող ա արդեն մեռնեմ էլ»,-մեզ հետ զրույցում ասաց ազատամարտիկը:

Նա նաև պահանջում է քաղաքապետ Հայկ Հայկյանից հրապարակավ ներողություն խնդրել իրենից: 

«Իրենք պիտի ինձնից մասսայական ներողություն էլ խնդրեն, ես ոստիկանություն էլ եմ զանգել: Մարզպետը ասել ա, որ ես գայի ավագանու նիստին իմ հարցը բարձրացնեի, ինձ զոռով քաղաքապետի տեղակալը հանում ա,քաղաքապետն էլ նույն ձևի կոպիտ խոսում ա, ու դրանից հետո ինքը իր ամբողջ աշխատակազմի մոտ գոռում ա, որ «Անդոն նառկաման ա, դրան ուշադրություն չդարձնեք»: Ես ուզում եմ, որ ինձանից արյան անալիզ վերցնեն, իմ մեջ դաժե սպիտային մաս չկա: Ես առողջ կյանքով եմ ապրում»,-Operativ.am-ին հայտնեց Անդրանիկ Օհանյանը:

Քաղաքապետի հրաժարականը պահանջում են շատ քաղաքացիներ, նրանք պարբերաբար բողոքի ակցիաներ են իրականացնում:

Դեկտեմբերին ՀՀ վարչապետ Նիկոլ Փաշինյանի Արարատ այցի ժամանակ Արարատի բնակիչները ստորագրահավաք են անցկացրել և Փաշինյանին անձամբ են դիմել: