Հուշանվերների և տուփերի արտադրությամբ զբաղվող վանաձորյան ընկերություններից մեկում աշխատում է հաշմանդամություն ունեցող 40 անձ
Վանաձորում գործող Apricot ընկերությունում աշխատում է հաշմանդամություն ունեցող շուրջ 40 անձ, ովքեր զբաղվում են, սառնարանային մագնիսների, փայտե հուշանվերների ու տուփերի, արծաթյա զարդերի, հայկական թեյի և շոկոլադի արտադրությամբ: Ընկերության ղեկավար Գայանե Խաչատրյանը նշեց, որ իրենց նպատակն է հաշմանդամություն ունեցող անձանց ապահովել աշխատանքով:
Խաչատրյանի խոսքով՝ ընկերություն ստեղծելու մտահաղացումը իր մոտ առաջացավ այն բանից հետո, երբ իմացավ, որ հաշմանդամություն ունեցող անձինք կրթության, մասնագիտության և աշխատանքի տեղավորման խնդիր ունեն:
«Գաղափար առաջացավ ստեղծելու մի արտադրություն, որտեղ հաշմանդամություն ունեցող անձինք կունենան հնարավորություն ինքնադրսևորվելու և աշխատելու: Եվ դա մենք կարողացանք կյանքի կոչել»,- ասաց Խաչատրյանը:
Ընկերությունը սկսել է իր աշխատանքը մագնիսների արտադրությունից, ինչից հետո հիմնել է արծաթյա զարդերի, փայտե հուշանվերների ու տուփերի, հայկական թեյի և շոկոլադի արտադրություն:
«Մենք ընդլայնվում ենք և կանգ չենք առնելու: Ընկերությունը նպատակ ունի ավելի շատ մարդկանց ներգրավել մեր աշխատանքին: Մենք արդեն իսկ գործում ենք Վանաձորից դուրս՝ աշխատողներ ունենք Վանաձորի հարակից գյուղերում, ինչպես նաև Երևանում»,- նշեց Խաչատրյանը:
Նա ասաց, որ ներկայումս խնդիր ունեն հատուկ տրանսպորտային միջոցի, քանի որ կան մարդիկ, ովքեր սայլակներով են տեղաշարժվում և չեն կարողանում հասնել աշխատավայր:
«Այդ մարդիկ տանն են աշխատում, մինչև հետագայում կարողանանք միջոցներ գտնել հատուկ մեքենաներ ձեռք բերելու համար»,- եզրափակեց Խաչատրյանը: