Հայաստանում մինչև հիմա գործընկերային պրոյեկտները որպես կանոն ձախողվել են, քանի որ ավարտվել են խաբելով ու քցելով. Փաշինյան
Հայաստանում մինչեւ հիմա գործընկերային կամ ինչպես ասում են կորպորատիվ պրոյեկտները որպես կանոն ձախողվել են: Այս մասին, այսօր՝ փետրվարի 23-ին, Վանաձորում, «Իմ քայլը հանուն Լոռու մարզի» ներդրումային բիզնես համաժողովի ժամանակ նշեց ՀՀ վարչապետ Նիկոլ Փաշինյանը:
«Մարդիկ ավելի շատ խուսափում են, ասում են՝ դե ես իմ գործը դնեմ, իմ գլխի տերն եմ, ուրիշի հետ գործ չունենամ, բայց մենք այստեղ տասնյակ նախագծեր տեսանք, որոնք գործընկերային տրամաբանության մեջ կլինեն շատ հաջողակ: Այս պահը շրջադարձային նշանակություն ունի: Հայաստանում գործընկերային տրամաբանությունը, ցավոք սրտի, լսել ենք, որ ավարտվում է խաբելով, քցելով, կռվով, պատերազմով եւ նոր Հայաստանում պետք է այս առումով նոր տրամաբանություն գործի»,-հայտարարեց Փաշինյանը:
Նա ընդգծեց, որ ամեն գործընկեր պետք է առաջին հերթին բարձր պատասխանատվությամբ վերաբերվի այն գործընկերոջը, որի հետ ինքը գործ է անում. «Սա շատ կարեւոր է: Այստեղ էլ պոտենցիալ ներդրողներ կան, նրանց հետ շփվում եմ, այդ վախն ու իներցիան դեռ կա՝ լավ արժի՞ մենք ուրիշի սկսած նախագծի մեջ մտնենք, ուրիշի հետ էդ ռիսկը կիսենք եւ այլն: Բայց կարծում եմ՝ սա հին մտածողության արգասիք է եւ պետք է ջանք գործադրենք, որ նոր Հայաստանում նոր տրամաբանություն աշխատի:
Սա իմ ամենակարեւոր եզրակացությունն է այսօրվա մեր քննարկումից: Բոլոր գործընկերներին մաղթում եմ փոխադարձ վստահություն: Դա այն է, որի վրա պետք է դողալ:
Մենք այլեւս այն երկրում չենք, որտեղ մոդա է խաբելը եւ քցելը: Մենք մի երկրում ենք, որտեղ ամենակարեւոր սկզբունքը վստահությունն է եւ վստահությունը չչարաշահելն է»,-իր խոսքն ամփոփեց վարչապետը: