Հերիք է ինչքան նստեցինք տեղներս, հիմա պետք է վեր կենալ և քայլել. Փաշինյանի կոչը Լոռու մարզում
«Իմ քայլը» հանուն Լոռու մարզի» ներդրումային բիզնես ծրագրի շրջանակներում Լոռիում անցկացվող բիզնես-ֆորումին ներկա է նաև ՀՀ վարչապետ Նիկոլ Փաշինյանը, որը, ելույթ ունենալով, խոսել է քաղաքական հեղափոխությունից տնտեսական հեղափոխություն անցում կատարելու մարտավարության մասին:
Նա հարց է առաջ քաշել, թե արդյոք հայ ժողովուրդը կարող է հասնել մի էֆեկտի, որը միջազգայնորեն ընդունված է համարել տնտեսական հրաշք.
«Այն ժողովուրդը, որ ի վիճակի է եղել հասնել մի էֆեկտի, որը կարող ենք համարել քաղաքական հրաշք, ուրեմն տնտեսական հրաշքը ևս մեր հասանելիության տիրույթում է, մենք պետք է հասկանանք»:
Իսկ տնտեսական հեղափոխության պարամետրերը, ըստ նրա, նոր աշխատատեղերն են, եկամուտների ու բարեկեցության նոր մակարդակը, իսկ արդյունքը պետք է լինի բարեկեցության նոր և բարձր մակարդակը:
«Մենք ուզում ենք մարդուն աջակցել, խրախուսել, որ նա ստեղծի այն, ինչը ստեղծել է իր հնարավորությունների տիրույթում: Ինչպե՞ս, խոսքո՞վ, այո´, նաև խոսքով: Բայց արդյո՞ք միայն խոսքով, իհարկե, ո´չ: Հաջորդ կարևոր ուղղությունը իրական տնտեսական գործունեության հնարավորություն ստեղծելն է կարգավորումների վերացման, մենաշնորհների, կոռուպցիայի բացառման և օրենսդրության կատարելագործման ճանապարհներով»,- հայտարարել է վարչապետը:
Նա ընդգծել է, որ տնտեսական հեղափոխության մեթոդաբանությունը չի տարբերվում քաղաքական հեղափոխության մեթոդաբանությունից: Յուրաքանչյուր քաղաքացի այս դեպքում էլ պետք է որոշում կայացնի մաս կազմել այդ հեղափոխության:
«Գաղափարաախութշությունը հետևյալն է, յուրաքանչյուր քաղաքացի պետք է իր հնարավորությունների չափով փակի այն փողոցները պայմանական, որտեղով հոսում է աղքատությունը, խեղճությունը»,- ասել է Փաշինյանը:
Խոսելով եղանակների մասին՝ հայտարարել է, որ այլևս ապօրինի երաշխիքներ չեն լինելու այս ճանապարհին: Ներկայացրել է տարբերությունները.
«Տնտեսության կոռուպցիոն համակարգը երբեմն ավելի մեծ պարզություններ ունի, քան ազատ մրցակցային համակարգը: Օրինակ, եթե որևէ բիզնես փայ է բարձրաստիճան պաշտոնյայի հետ, նշանակում է, որ պատասխանատվությունը կիսված է, և երբ ահազանգ լինի, որ բիզնեսին ինչ-որ բան սպառնում է, կարելի է հարկայինին հրահանգել, որ իր հետ գործ չունեք, անհարմար մրցակցին շարքից հանել: Նոր իրավիճակը տարբերվում է սրանով, որ նման ապօրինի երաշխիքներ չկան, երաշխիքները բոլորի համար հավասար են, և ամեն մեկն իր բիզնեսի պատասխանատվությունը չի կարող կիսել իշխանության մեջ ունեցած ներկայացուցչի հետ, որևէ իշխանական օղակ իր համար արհեստական ու ապօրինի խոչընդոտ չի կարող ստեղծել»:
Ապա Փաշինյանը խոսել է կարգախոսների մասին՝ հայտարարելով, որ քաղաքական հեղափոխության կարգախոսը շատ կարևոր է տնտեսական հեղափոխության համար: Ըստ այնմ.
«Տնտեսական հեղափոխության պատասխանատվությունը կարող են կրել իսկապես «դուխով» գործարարները, ովքեր վստահ են իրենց ստեղծարար տաղանդի, աշխատասիրության, ազնվության ու սկզբունքայնության վրա»,- հայտարարել է նա:
Նա հույս է հայտնել, որ համաժողովի մասնակիցները գիտակցում են իրենցից յուրաքանչյուրի պատասխանատվությունն այս գործում, հետևաբար կոչ է արել.
«Ուզում եմ ևս մեկ անգամ հռչակել տնտեսական հեղափոխության այն կարգախոսը, որը էքսպրոմտով ստեղծվեց և մի քիչ էլ հումորային ենթատեքստ ստացավ. հերի´ք է ինչքան նստեցինք տեղներս, հիմա պետք է վեր կենալ և քայլել»: