Աբխազիայում մեկ շաբաթից կարող է դադարել էլեկտրաէներգիայի մատակարարումը
««Ինգուրի» ՀԷԿ-ում ջրի կրիտիկական պակասի պատճառով հիդրոէլեկտրակայանը չի կարողանա էլեկտրաէներգիա արտադրել և մատակարարել Աբխազիային, այնպես որ, դե ֆակտո իշխանությունները պետք է մտածեն այլընտրանքային աղբյուրների մասին, որպեսզի էլեկտրաէներգիաչկորցնեն »,- հայտարարել է ՀԷԿ-ի ֆինանսական տնօրեն Զվիադ Քիլասոնիոն Sputnik Georgia-ին տված հարցազրույցում:
Այն, որ Աբխազւիայում էլեկտրաէներգիայի մատակարարման շուրջ կարող են հիմնախնդիրներ ծագել, հայտնի դարձավ անցյալ շաբաթ ՀԷԿ-ի տնօրենների խորհրդի նախագահ Լեվան Մեբոնիայի հայտարարությունից հետո․
«Եթե Աբխազիան չիրականացնի էլեկտրաէներգիայի սպառման սահմանափակումները, ապա մարտի 5-ին ջրամբարում ջուր չի մնա, քանի որ այժմ ջրամբարի ջուրը գտնվում է ամենացածր մակարդակի վրա»:
Տեղական «Չերնոմորէներգո» ընկերությունը հայտարարել է սահմանափակումների, բնակչությանը էլեկտրաէներգիայի մատակարարման ժամանակացույցի ներդրման մասին:
Այժմ Աբխազիայի իշխանությունները բանակցություններ են վարում Ռուսաստանի հետ էլեկտրաէներգիա ներմուծելու ուղղությամբ: Եթե համաձայնություն ձեռք բերվի, ապա ՌԴ-ից ներմուծվող էլեկտրաէներգիայի 20 տոկոսի վարձը ստիպված կլինի վճարել Վրաստանի կենտրոնական իշխանությունը:
Ինգուրի ՀԷԿ-ը Կովկասի խոշորագույն հիդրոէլեկտրակայանն է: Կառուցվել է 1970-ական թվականներին: Ներկա պահին ձեռնարկության արտադրած հզորությունը կազմում է 1300 ՄՎտ, ինչը Վրաստանի տարածքի էլեկտրաէներգիայի պահանջարկի կեսն է: Ձմռանը «Ինգուրի» հիդրոէլեկտրակայանի գրեթե ողջ արտադրած էլեկտրաէներգիան մատակարարվում է Աբխազիա:
Նշենք, որ «Ինգուրի» ջրամբարը վրացական իշխանությունների վերահսկողության տակ գտնվող տարածքում է, իսկ Էրիսսկալի գետի վրա գտնվող 4 տարբեր դիսկրետ հիդրոէլեկտրակայանները, Գալիի ջրամբարը և վերահսկիչ վահանակը վերահսկվում են Աբխազիայի իշխանությունների կողմից:
Վրաստանը Ցխինվալիի շրջանի, ինչպես նաև Աբխազիայի նկատմամբ վերահսկողությունը կորցրել է անցյալ դարի 90-ականների սկզբին՝ զինված հակամարտություններից հետո: 2008 թվականի օգոստոսյան պատերազմից հետո Ռուսաստանը ճանաչեց այդ տարածաշրջանների անկախությունը: Թբիլիսին, ի պատասխան, դադարեցրեց Մոսկվայի հետ դիվանագիտական հարաբերությունները: