Արթուր Վանեցյանը հայտնեց հետախուզման մեջ գտնվող Լևոն Սարգսյանի գտնվելու վայրը
Բնապահպանության նախկին նախարար Արամ Հարությունյանն օրինական կերպով չի հատել Հայաստանի պետական սահմանը: Այս մասին կառավարությունում լրագրողների հետ ճեպազրույցում հայտարարեց Ազգային անվտանգության ծառայության տնօրեն ԱրթուրՎանեցյանը:
Նշենք, որ Հարությունյանն այս պահին գտնվում է հետախուզման մեջ: Վերջինս
մեղադրվում է առանձնապես խոշոր չափի կաշառք ստանալու և փողերի լվացման համար: Նրա նկատմամբ խափանման միջոց է ընտրված կալանավորումը: Նշենք, որ խոսքը 14 մլն դոլար կաշառք ստանալու մասին է: Ըստ Հարությունյանի պաշտպանի՝ նա Հայաստանում է:
Արթուր Վանեցյանի խոսքով՝ հետախուզման մեջ գտնվող Սերժ Սարգսյանի եղբայրը՝ Լեւոն Սարգսյանը, Հայաստանի պետական սահմանը հատել է օրինական կարգով:
Վանեցյանը նշեց, որ իրենք գիտեն Լեւոն Սարգսյանի գտնվելու վայրը. «Նա արաբական երկրներից մեկում է, սակայն նրան Հայաստան վերադարձնելն այնքան էլ հեշտ չէ»,- ասաց նա:
ԱԱԾ տնօրենի խոսքով՝ Հայաստանի պետական սահմանը օրինական կերպով հատել է
նաեւ «Սուրբ Գրիգոր Լուսավորիչ» բժշկական կենտրոնում տեղի ունեցած ենթադրյալ չարաշահումների գործով հետախուզման մեջ գտնվող, «Սուրբ Գրիգոր Լուսավորիչ» բժշկական կենտրոնի նախկին տնօրենը:
Վանեցյանը նշեց, որ օրինական կերպով սահմանը հատած անձանց վերաբերյալ որևէ խափանման միջոց կիրառված չի եղել այն ժամանակահատվածում, երբ նրանք լքել են Հայաստանը, իսկ նման պայմաններում իրավապահները չէին կարող սահմանափակել նրանց տեղաշարժը:
Հիշեցնենք, որ ապօրինի հարստացման եւ հայտարարագրման ենթակա գույքը թաքցնելու համար հարուցված քրեական գործի շրջանակում 2018 թվականի հուլիսի 7-ին առաջին ատյանի դատարանը Լեւոն Սարգսյանի նկատմամբ խափանման միջոց էր ընտրել կալանավորումը եւ նրա նկատմամբ հետախուզում հայտարարել։ Քննությամբ պարզվել է նաեւ, որ ՀՀ հատուկ հանձնարարություններով դեսպան, պաշտոնատար անձ հանդիսացող Լեւոն Սարգսյանն ու նրա դուստրը 2017թ.-ի հաշվետու ժամանակաշրջանի համար հայտարարատու պաշտոնատար անձի համար սահմանված դեպքերում եւ կարգով ՀՀ բարձրաստիճան պաշտոնատար անձանց էթիկայի հանձնաժողով են ներկայացրել իրենց գույքի եւ եկամուտների հայտարարագրերը, որտեղ չեն հայտարարագրել իրենց կողմից որպես ավանդ ներդրված գումարները եւ թաքցրել են դրանք, ինչը հանգեցրել է Լեւոն Սարգսյանի եւ Անի Սարգսյանի կողմից առանձնապես խոշոր չափերով գույքի չհայտարարագրմանը, ինչպես նաեւ՝ հաշվետու ժամանակահատվածում նրանց գույքերի ավելացումն էականորեն գերազանցել է նրանց օրինական եկամուտները, ինչը ողջամտորեն չի հիմնավորվում հայտարարագրերով, այսինքն` վերջիններս ապօրինի հարստացել են: