Ես Քոչարյանների ընտանիքի դեմ որևէ անձնական խնդիր չունեմ. Արթուր Վանեցյան
«Դատի տալը ցանկացած քաղաքացու սահմանադրական իրավունքն է, պարոն Քոչարյանը կարող է դատի տալ, դատարանը կորոշի՝ մեղավո՞ր ենք, թե՞ ոչ: Քաղաքական հետապնդման խնդիր չկա, հաղորդագրությունը տեսել եք, օբյեկտիվ ներկայացրել ենք, մենք չէինք ուզում հաղորդագրություն տարածել, իրենք տարածեցին: Ես շատ կարճ պարզաբանում էի տվել, որից հետո իրենք ծավալուն ելույթով հանդես եկան, ու մենք ստիպված էինք ուղղակի արձագանքել»,-այսօր կառավարությունում նշեց ՀՀ ԱԱԾ պետ Արթուր Վանեցյանը՝ անդրադառնալով Սեդրակ Քոչարյանի կողմից իրենց դատի տալու հանգամանքին:
Ներկայացվել է քաղհայց մի արտահայտության համար, որն ի սկզբանե հերքել է ինքը, ասում է Վանեցյանը, իսկ անմեղության կանխավարկած չի հերքվել: Իրենք հանգամանքները ներկայացրել են հաղորդագրության մեջ:
Ինչ վերաբերում է այսպես կոչված՝ փողերի լվացման մեղադրանքով անձանց ներգրավվածությանը, Վանեցյանը նշեց, որ շատ անձինք են ներգրավված գործում: Շատ ծավալուն գործ է, որի մասին այս պահին մանրամասն չի կարող խոսել: Հարցին, թե դա վերաբերո՞ւմ է Քոչարյանների ընտանիքի բոլոր անդամներին, պատասխանեց.
«Քոչարյանների ընտանիքի մեջ մտնում են ընտանիքի բոլոր անդամները, մի՛ սևեռեք հարցը, Քոչարյանների ընտանիք և այլն, ես Քոչարյանների ընտանիքի դեմ որևէ անձնական խնդիր չունեմ, որևէ բան չեն արել անձամբ ինձ, որ անընդհատ խոսվում է, Քոչարյանը եղել է ՀՀ երկրորդ նախագահը, ունեցել է գործունեության ընթացքում, իհարկե, նաև շատ դրական գործեր, եղել է Արցախի Հանրապետության առաջին նախագահ, և ես, որպես ԱԱԾ ծառայող, որը նաև ծառայել է այդ տարիներին, չեմ կարող անձնական կամ այլ բաներով խնդիրներ ունենամ այդ ընտանիքի հետ»:
Այնուհետ դարձյալ կոչ արեց լրագրողներին չանձնականացնել խնդիրը: