Դավիթ Սանասարյանը՝ ԵՊՀ-ի, Ուրցաձորի չարաշահումների և իր հասցեին հնչած մեղադրանքների մասին. (տեսանյութ)
Պետական վերահսկողական ծառայությանը նկատմամբ «Ֆրեզեն» ՍՊԸ-ի տնօրեն Հրանտ Պիվազյանի մեղադրանքները Դավիթ Սանասարյանը համարում է անհիմն, ասում, որ իրենք իրենց ուսումնասիրություններն են կատարում, իսկ տարբեր լրատվամիջոցներով տարածվող տեղեկությունները համարում է այսպես կոչված «պատի տակի խոսակցություններ»:
«Ուսումնասիրությունից հետո հանրությունը կիմանա` մենք օրենքով մեզ լիազորված աշխատանքներն ենք իրականացնում, որևէ մասնավորի հետ հանդիպելու կարիք չունեմ, նայում ենք օրենքի տառը պահպանելուն: Ես պատի տակի բամբասանքները չեմ մեկնաբանում, շատերը պատվեր են կատարում, ուշադիր թող նայեն` ձերբակալվողի նմա՞ն եմ: Շատերը երազ են տեսնում, փորձում են գրել «Ֆեյսբուքում», ես այդ ալիքից ուժեղանում եմ, որովհետևր տեսնում եմ, որ նոր ավելի նպատակասլաց փուլ ենք մտնում, դուք կարող եք նայել, թե այդ քարոզչամիջոցները որտեղից են գալիս»,- ասաց նա:
Սանասարյանն անդրադարձավ նաև ԵՊՀ-ում կատարվող ուսումնասիրությունների ու չարաշահումների բացահայտման ընթացքի վերաբերյալ տեղեկություններին: Նշեց, որ դրանք ընթացքի մեջ են, հավանաբար հաջորդ շաբաթ տեղեկություն կտա, իսկ չարաշահումները ավելին են, քան 800 մլն դրամը, ինչպես խոսվում է:
«Քննչական կոմիտեն այս պահին զբաղվում է դրանով, ոստիկանությունը գործն ուղարկել է քննության, մենք պատրաստ ենք ցանկացած գրածի համար մանրամասներ ներկայացնել»,- ասաց նա:
Արամ Սիմոնյանի սպառնալիքներին, դատարան դիմելու վերաբերյալ, Սանասարյանն այսպես արձագանքեց.
«Պարոն Սիմոնյանին մի քանի անգամ կոչ եմ արել, խրախուսում եմ, որ դիմի իրավապահ մարմիններին, տասնյակ տարիների պայքարի ընթացքում կռիվ եմ տվել քաղաքական ճնշումների դեմ: Որ պահին, որ կզգամ՝ անցնում եմ գիծը, հրաժեշտ կտամ քաղաքականությանը»:
Նշեց, որ նաև ԵՊԲՀ-ում են ընթանում ուսումնասիրություններ, նորություններ չունեն, իսկ նպատակը, վստահեցնում է, ինտրիգներ փնտրելը չէ.
«Մենք ոչ թե զբաղված ենք ինտրիգներ ապահովելով, այլ խնդիրը հետևյալն է. ինչպե՞ս անենք, որ չկրկնվեն նախկինում եղած յուրացումները, չարաշահումները»,- ասաց Սանասարյանը
Իսկ Ուրցաձոր համայնքում ուսումնասիրություններ, Սանասարյանի խոսքով, կատարել են գյուղացիների բողոքների հիման վրա, բայց հանդիպումից հետո հասկացել են, որ այս փուլում դրանք չեն շարունակելու, իսկ թե ինչն է պատճառը, նշեց, որ իրենց «ռեսուրսները սահմանափակ են»: