Մեր զինվորի հացի հարցն ենք լուծում, ու վա´յ նրան, ով էս պրոցեսում որևէ այլ մոտիվացիայով կառաջնորդվի. Նիկոլ Փաշինյան
Պաշտպանության նախարարի տեղակալ Մակար Ղամբարյանը կառավարության այսօրվա՝ փետրվարի 21-ի նիստում ներկայացրել է նախագիծ, որով առաջարկվում է ԶՈՒ պարենավորման գործընթացում փոփոխություն մտցնել:
«Մինչ օրս ԶՈւ պարենավորման գործընթացը կազմակերպվում էր հենց ԶՈւ միջոցով: Ամբողջ շղթան՝ ձեռքբերումներից մինչև բուն պատրաստում և մատուցում իրականացվում էր ԶՈւ միջոցով, սակայն տարբեր օղակներում տարբեր խնդիրներ և խոչընդոտներ էին ի հայտ գալիս, արդյունքում մատակարարվող սննդի որակից լինում էր դժգոհություն: Ուսումնասիրելով տարբեր երկրների փորձը` եկանք այն եզրահանգման, որ լավագույն տարբերակը կլինի կազմակերպման ձևաչափի փոփոխությունը՝ ներգրավելով մասնավոր գործընկերոջ», – ասաց Մակար Ղամբարյանը:
Նախագծով առաջարկվում է սահմանել նման ձևաչափով ծրագրին ներկայացվող նվազագույն պահանջները, այն է՝
ա. ճաշարանների, պահեստների ու ճաշարանային արտադրամասերի վերակառուցում կամ վերանորոգում և այդ աշխատանքների իրականացման ժամանակահատվածում պարենավորման գործընթացի անխափանության ապահովում.
բ. տեխնիկական միջոցների, կահույքի, խոհանոցային սպասքի և այլ անհրաժեշտ գույքային համալրում ու փոխարինում ժամանակակից միջոցներով.
գ. օդափոխության, ջեռուցման, ջրամատակարարման, ջրահեռացման, հակահրդեհային արդիական համակարգերի տեղադրում.
դ. սննդի գծաշարային բաշխում (ըստ հնարավորության), պարենավորման կազմակերպում դաշտային պայմաններում, ինչպես նաև առաջնագծում (ըստ հնարավորության), ճաշատեսակների ընդլայնում և բազմազանության ապահովում.
ե. սանիտարահիգենիկ միջոցառումներ.
զ. գոյություն ունեցող աշխատատեղերի պահպանում և նորերի ստեղծում, գոյություն ունեցող աշխատատեղերի միջին աշխատավարձերի համեմատ աշխատավարձերի աճի ապահովում.
է. պայմանագրի կատարման ապահովագրություն պայմանագրի գնի 10%-ի չափով, վերանորոգման աշխատանքների կատարման ապահովագրություն վերանորոգման օբյեկտի ամբողջ արժեքով, աշխատակիցների կյանքի և առողջության ապահովագրություն դժբախտ պատահարներից, փոխադրող միջոցի և փոխադրվող բեռի ապահովագրություն.
ը. ԶՈՒ կարիքների համար ձևավորվող պահուստների թարմացում և կառավարում (ըստ հնարավորության).
թ. թափանցիկության, հաշվետվողականության և վերահսկողության մեխանիզմներ.
ժ. ծրագրի ընթացքում ձեռք բերված կամ ստեղծված նյութական և ոչ նյութական ակտիվների ծրագրի ավարտից հետո որպես սեփականություն անցնում են Հայաստանի Հանրապետության պաշտպանության նախարարությանը:
Ծրագիրն իրականացվում է.
ա. հատուկ ու բացառիկ իրավունքի առկայության հիմքով.
բ. մինչև երեք տարի ժամկետով.
գ. առնվազն երեք տարբեր գործընկերների միջոցով՝ յուրաքանչյուրի հետ ոչ ավել քան 8000 զինծառայողների համար.
Ծրագրի իրականացման նպատակով կնքվող պայմանագրում կարող են չներառվել Հայաստանի Հանրապետության կառավարության 2017 թվականի մայիսի 4-ի N 526-Ն որոշման N 1 հավելվածով սահմանված կարգի (այսուհետ՝ Կարգ) 33-րդ կետով նախատեսված դրույթները՝ դրանցով նախատեսված կարգավորումների փոխարեն անհրաժեշտության դեպքում սահմանելով «Գնումների մասին» Հայաստանի Հանրապետության օրենքին չհակասող այլ դրույթներ:
Թույլատրել Հայաստանի Հանրապետության պաշտպանության նախարարությանը՝ Ծրագրի իրականացման նպատակով ձեռքբերումը կազմակերպել՝ «Գնումների մասին» Հայաստանի Հանրապետության օրենքի 23-րդ հոդվածի 1-ին մասի 1-ին կետին համապատասխան` գնումը կատարելով Կարգի 71-րդ կետի 3-րդ ենթակետով սահմանված կարգով:
Նշված հայտարարության հիման վրա հետաքրքրվածության հայտեր են ներկայացրել թվով երկու ընկերություններ, որոնց հայտերի ուսումնասիրման և գնահատման արդյունքները ներկայացվել են ֆինանսատնտեսական նախարարական կոմիտեի 18.01.19թ. նիստի քննարկմանը:
Միաժամանակ, հաշվի առնելով ծրագրի փորձնական լինելու հանգամանքը, հնարավոր ռիսկերից խուսափելու նպատակով նախատեսվում է ծրագրի իրականացման համար ձեռքբերումը կազմակերպել «Գնումների մասին» ՀՀ օրենքի 23-րդ հոդվածի 1-ին մասի 1-ին կետին համապատասխան` հատուկ ու բացառիկ իրավունքի առկայության հիմքով:
«Այս պրոցեսը պետք է լինի ներգրավողական, և պետք է այս հարցը լուծենք: Մենք զինվորների համար պետք է ապահովենք պատշաճ սնունդ, սա ձեր վրա դնում է հատուկ պատասխանատվություն և այստեղ պետք է առանձնահատուկ մեխանիզմներ մտածել՝ հանրության ներկայացուցիչներին, քաղաքացիական հասարակության ներկայացուցիչներին, այլ գերատեսչությունների ներկայացուցիչներին ներգրավելով, որ այս պրոցեսի վերաբերյալ որևէ կասկած չլինի: Մենք մեր զինվորի հացի հարցն ենք լուծում, ու վա´յ նրան, ով էս պրոցեսում որևէ այլ մոտիվացիայով կառաջնորդվի», – ասաց Նիկոլ Փաշինյանը:
Նախագիծն ընդունվեց միաձայն: